Manipur inthlan thawh khatna neiha vote thlakna hmuna duty kutthlaktua puh, Congress candidate man chu bail-a chhuah leh tawh a ni.
Congress hruaitu hlun, Jairam Ramesh chuan Kangpokpi district-a Saitu biala an candidate, Lamtinthang Haokip-a man a ni chu Union Home Minister Amit Shah leh Manipur Chief Minister N Biren Singh ten ‘mipui rorelna an thahna’ niin a sawi hial.
New Keithelmanbi polling station-a presiding officer chuan Haokip-a lakah hian Imphal police station-ah complaint a thehlut a. Sorkar hnathawk lai a hna thawh tibuaia puh bakah kutthlaka puh a ni.
Thawhtanni tuk khan man niin vote thlak mek lai a ni a, zanlai pelh hnuah bail-a chhuah a ni.
Haokip-a polling agent Andrew Gangmei chuan Chief Electoral Officer Rajesh Agarwal hnenah BJP thlawptuten booth chu thununa vote thlak tumte lo hruai kawi an tum tih thawm a hriat veleh a pan ve nghal niin a tar lang.
“Inthlan buaipuitute hnenah mipuite chu an duh ang thlantir tura a ti chu ani hian a lo hnar a ni,” a ti.
An inhniam hnuah amah thlawptute leh mi dang chu an intibuai a, EVM pawh a chhiat phah a. Buaina tihreh nan police duty pawhin silaimu awm lovin a silai a hmet puak niin a sawi bawk.
Presiding officer hian police hnenah hian BJP lam tan chungin complaint a thehlut ta mai zawk niin a sawi.