Russia-in Ukraine a rûn mekah Thawhlehni tuk khan laipuia a kahnaah Indian zirlai pakhat a thi tih foreign ministry chuan a puang.
“Tukin zinga laipuia Kharkiv kahnaah Indian zirlai a thi tih puan a ngai hi a hrehawm a. Ministry chuan a chhungte pawh a bepawp tawh a, kan tawrhpui tak zet a ni,” tiin external affairs ministry chuan Twitter-ah a tar lang.
Ukraine khawpui lian ber dawt, Kharkiv hi Russian sipaiten an chhut nasat avangin thil chhia pawh a tam hle a. Video pakhatah chuan khawpui chhunga sorkar in lian ber chu a tlusawp.
Thawhlehni tuk khan Indian Embassy chuan khawpui ber, Kyiv-a Indian la awm zawng zawngte chu ‘vawiinah hmanhmawh taka chhuah tur, rel a ni emaw, hmanraw dang hmang pawhin chhuah tur’ tiin thu a pe.
Thlalem atanga thlalak tihchhuahah chuan Russian sipai lirtheite chuan hmarthlang lam atangin Kyiv khawpui an pan sung sung a. Tank, laipui hnuk chi motor, sipai motor dang leh sipai hmanraw phur chi chi dang dang an ni tih United States-a space technology company chuan a tar lang.
Ukraine-ah hian Indian zirlai 16,000 vel an tangkhang a. Lei hnuaia tawmna, metro station leh bomb shelter-a an awmna atangin tam tak chuan social media-ah thlalak leh video an dah chhuak a. Indian 8,000 vel chu thlawhna hmanga hruai haw tawh an ni thung.
Indian zirlai tam ber hi Ukraine khawchhak lam, Russian sipaite chet natna a ni a, an tan khawthlang lama ramri thlen a hautak hle a. Khua a vawt bawk si a, thenawm ram atanga thlawhnaa phurh haw tura ramri kân a khirh hle a ni.
Ukraine president chuan Russia-in Kharkiv beia civil mi tam tak an thah avangin indona thubuai (war crime) an nei ngei tih a sawi.
Volodymyr Zelensky chuan Thawhtannia an khawpui lian ber dawt kahnaah hian Russia hian civil mite chenna an tum ngei tih a hmututen an sawi tih a sawi.
Mihring dikna chanvo neitute pawhin Russia-in a thenawm a rûn avang hian war crime a awm ngei tih a sawi.
International Criminal Court (ICC) chuan he puhna hi an chhui dawn.
‘War crime’ tia an sawi mai hi indonaa mihring dikna chanvo palzutna a ni deuh ber.
Chief Prosecutor Karim Khan pawhin Ukraine-ah hian hetiang thil hi a thleng ngei niin a sawi a. Russia-in kum 2014 atang tawh khan hetiang hi a thlen tawh niin a sawi.
Chhui chiang tur chuan ICC judge-ten an pawmpui phawt a ngai.