Finance changtu, Chief Minister Zoramthanga chuan Mizoram sorkarin Myanmar raltlante a puih chhunzawm zel theih nan a tum hnih nan central sorkarah puihna a dil leh mek thu house a hrilh.
Nimina assembly session neihah Congress member Lalrindika Ralte zawhna leh member dangte zawh belhna chhangin Zoramthanga chuan, “Raltlante hi India sorkarin direct-in pui thei lo mah se keini min tanpui a, keinin raltlan kan tanpui ve thung,” a ti a, tunah hian a tum hnih nan central sorkarah puihna an dil leh mek thu a sawi.
Zorama chuan raltlan an rawn luh belh zel thu sawiin, February 12, 2022 thlenga sorkarin a chhinchhiah danin Mizoramah Myanmar raltlan mi 24,289 an awm thu a sawi.
Raltlante tana state sorkarin tanpuina a pek dan sawi chhunzawmin, district hrang hranga raltlante buaipui tura committee an din hnenah sum an pek zel thu a sawi a, tunhnaiah puihna an sem chhuahah erawh la dawng ve lo an awm thu a sawi bawk.
Chief minister chuan raltlante chu mangang leh harsa loa an awmna tura hma an lak thu a sawi rualin, vai tan rual a tul thu a sawi bawk.
Finance changtu chuan SEDP hnuaia line department-te hnena sum an sem dan sawi tel bawkin, kum 2019-20 khan Rs. nuai Rs 56,260.79 an sem thute, kum 2020-21-ah Rs. nuai 11,383.91, kum 2021-2022-ah Rs. nuai 8,893.45 sem a ni thu leh sorkar kum thum chhungin SEDP hnuai Rs. nuai 76,538.15 sem chhuah a nih tawh thu a sawi bawk a ni.