IN SA TURTE HRIAT ATAN

• Dr. LALDINPUIA, MZU

November ni 1, 2021 a\ang khan Aizawl Municipal Corporation (AMC) huamchhunga hman tur dan thar- AMC Site Development & Slope Modification (SD&SM) Regulations, 2017 chu hman \an a ni a. Dan thar anih angin, mipui tana hriat tur \ul, a kalhmang tlangpui han tarlang ila. In sa thar tur kan la awm zel dawn avangin, kan bangbo lutuk loh nana puitu atan ni se.
SD&SM hian a tum ber mai chu, AMC huamchhunga insak leh a kaihhnawih himna hi a ni a. Leimin kan tawh \hin tam zawkte hi inhmun laih min te, lungrem himlo chim te, tuiluankawr mumal loh avangte leh lei paihna fimkhur loh avangte a ni ber. Heng leimin kan tawhna chhan hrang hrangte hi a lo ziaawm theih nan, mipui leh khawpui himna atan, he dan thar duhawm tak, India rama dan la awm ngailo hi a lo piang a ni.November ni 1 hmalama insak phalna lo nei tawh, mahse, a hmunhma lo la khawih lo te pawh he dan thar ang hian, lei laih phalna dil a ngai. Hetiang hian SD&SM hnuaia insak dil dan han sawi ila.

1. AMC office, |huampui-ah in sa thar tur chuan dilna form a lei (Rs. 100/- man) emaw, website (https://amcmizoram.com/documents/site-development-slope-modification/) a\angin a download ang. Dilna hi chi hnih- Regular site leh Engineered Site Development a awm. Regular site hi, AMC in a pawm Landslide Hazard Map-a ‘Low hazard zone’ huamchhung ami, lei laih ngai lo leh lungrem pawh ngai lo tur hmun a ni (Hei hian, AMC huamchhung 2.29% a awh). Aizawl-a hmun tam zawk hi Engineered Site Development huamchh<ng a ni thung (97.71% a awh). Insakna tur hmun kha ‘Low hazard zone’ pawh ni se, lei laih a ngai a, lungrem a ngai anih chuan, Engineered Site Development hmun anga ngaih tur a ni. Insak/ lei laih dilna thehluh dawnah pawh application form hman tlanglawn ber chu Engineered Site Development form hi a ni. Hriat chian lehzual kan duh chuan, AMC office-a thawkte emaw, AMC technical license holder emaw zawhfiah ni se.
2. Insak kan tum dan chu Permanent building emaw, Semi-Permanent emaw, Ordinary building emaw pawh ni se, SD&SM dan ang hian dil vek a ngai a. Ban phunna tur chauh laih ngai pawh ni se, dil tho a ngai.
3. SD&SM hnuaiah hian technical license holder chi 4- Geologist, Soil Engineer, Civil Engineer leh awmhona- Firm a awm a. February thla thlengin, Geologist 50, Civil Engineer 62, Soil Engineer 3 leh Firm 5 an awm. An hming list hi biak pawhna tur nambar nen AMC website-a Site Development & Slope Modification category a\anga hmuh mai theih a ni. Heng zinga kan mi duh ber kha biak r^wn mai tur a ni a. A theih chuan, Geologist/ Soil Engineer te hi biak hmasak ni thei se. Kan hmelhriat, Architect leh Engineer te lo biak hmasak pawh hi a sual lutuk lo na a, kan leilung dinhmun kha hriat fiah hmasak phawt a ngai \hin a. Kan insak tumna hmun azira tum lawk anglo deuh hleka insak pawh a ngai thei, hriat lawk a \ha.
4. Architect/ Structural Engineer te kan be rawn hmasa anih pawhin a pawina a awm lutuk lo va. Mahse, anni emaw inneitu in emaw, SD&SM hnuaia in register, Geologist leh Civil Engineer biak leh tho a ngai thung. SD&SM hnuaia in register chauhin, in sak dan tur ruangam din (site plan) leh lungrem (retaining wall) duan an khawih theih avangin, kan Strucural Engineer biak kha SD&SM hnuaiah a in register tho em, tih zawh hmasak a \ha.
5. Geologist/ Soil Engineer leh Civil Engineer ten insak dan tura ruahmanna an lo siam tawh zulzui hian, Building Regulations anga insak dan tur kimchang thehluh leh tur a ni a. Building regulations hnuaiah hian, AMC hnuaia in register Architect emaw Engineer in emaw, online hmangin dilna hi a siam ang. Online hmanga insak phalna dilnaah hian, SD&SM dan anga insak phalna kha neih hmasak a ngai thung.
6. Dan thar hnuaia in sa tur ten, in kan sakna tur atana technical license holder-in a duan anga lei laih remtih puina (No objection certificate- NOC) hi, in sakna tur \henawm hnaite leh in sakna tur hmuna Local Council phalna lak a ngai.
7. Kan in sakna tur hmun azirin, report siam danah inanglo hret a awm a. AMC-in a pawm, Landslide Hazard Map behchhanin Aizawl hi hmun li-ah \hen a ni- ‘Very High’, ‘High’, ‘Moderate’ leh ‘Low’ tiin. Hei hi leimin thlen mai hlauhawm dan indawt anga duan a ni a. He tehkhawnga kan insakna tur hmun awmna azirin, phalna pek chhuah hun rei zawng pawh a danglam thei.
8. Map-a ‘Very High’ emaw ‘High’ emaw hnuaiah kan awm anih chuan, kan insakna tur hmunah khan Geologist/ Soil Engineer-in lei endik (test) tur kg 5-10 a rawn la ang a. Hei hi laboratory-ah a test tir ang. Geologist/ Soil Engineer-in insakna tur hmunhma, a leilung chu uluk taka zirchiangin, lei laih a \ul chuan, a laih dan tur him thei ang turin a duang ang. Lei dawl ngai, lungrem ngai a nih chuan, eng ang chi nge rem tur leh a awmna turte, tuiluankawr awmna turte leh \ul dangte Civil Engineer a hriattir ang. Geologist/ Soil Engineer-in report a siam hi Geotechnical Report tih a ni. Civil Engineer-in insak dan tur kalhmang, lungrem leh tuiluankawr awm dan lem a ziak te, insakna tur LSC te, \henawm leh Local Council a\anga NOC te nen AMC office-ah dilna thehluh tur a ni. Technical license holder-in lei laih dan tur tam zawk a chh<t ang a, 500cu.m chin hnuailamah, AMC-ah Rs. 500/- dilna thehluh rualin pek tur a ni a; 500cu.m chunglam chu 1cu.m zelah Rs. 0.50 zel belh tur a ni. Dilna thehluh hian pawisa pek nghal a ngai a; dilna thehluh theih hun chh<ng hi, pisa kai hun pangngaiah, nipui laiin tlai dar 3:30 thleng a pek theih a, thlasikah dar 3:00 P.M. thleng a pek theih.
9. Lei endik (Soil test) theihna hmun hi panga a awm a, chungte chu- Dept. of Civil Engineering, MZU te, DG&M Luangmual te, PWD lab. Zuangtui te, Dept. of Geology, Govt. Zirtiri Res. Science College leh PUC-ah te a ni. Lei endik hun chh<ng hian ni 3 a\anga kar 1 a awh \hin. Technical license holder azirin, lei endik tur hi insakna tur hmun ami lak saka, laboratory a thlen a, a result pawh ngaihven sak emaw, in neitute tihtir vek emaw a ni \hin a, kan rawih turte kha an tihdan tur leh an test tirna hmun tur kha zawh chian hmasak ni se. Lei endikna man hi Rs. 2,800- 11,000 inkar a ni.
10. Insakna hmun tur hi ‘Moderate’ leh ‘Low’ hnuai a lo nih chuan, lei endik (test) report hi geotechnical report-ah ziah lan tel kher a ngai ve lo a. Lei endik a\ang hian, insakna tur hmunin a dawl theih zat bakah lei nihphung hrang hrang hriat theihna a nih avangin, insakna tur him nan a \ha viau a. Structural Engineer-in insakna tur atana a duan nan leh lungrem dawl dan tur a ruahmanna atana \angkai tak a ni a. Endik (test) anih loh hian, a awm ang kha dah tel tho tho a ngaih avangin lei endik tir zel hi duhthusam a ni.
11. Dilna hi AMC-ah thehluh a nih hnuah, thehluh hmasak dan indawtin AMC Geologist Consultant-ten endik hun tur an ruat a. Hei hi thehluh a\anga kar 2/1 hnuah a ni tlangpui a, a aia rei leh a hma pawh a awm bawk. Inneitu leh a rawih technical license holder awm laiin an endik ang a. Lei laih dan tura ruahmante inhrilhfiah in, leilung a endik dan te leh lei test tur a lakna te enfiah a ni ang, a hmuh dan hi Consultant hian report a siam ang a, ni 2/3 hnuah lei laih phalna (permission) hi a chhuak ang a, AMC office a\anga inneitu hi hriattir an nih hnuah, phalna hi office-ah lam tur a ni a. Technical license holder- Geologist/ Soil Engineer pawh a hriattir ang.
12. Insakna tur hmun kha ‘Very High Zone’-ah a tlak erawh chuan, kan dilna chu Geologists leh Engineer te awmna Geologic Review Board (GRB)-in a thlir ang. GRB hi thla khatah vawi hnih an \hu tlangpui a; a \ul dan azirin siam \hat ngai lai rawtna te neiin, technical license holder ten an siam \ha leh \hin; leilung hmunhma leh dinhmun azira in sak phal lohna hial thuneihna a nei. GRB \hut a\anga kar khat chhungin phalna tihchhuah a ni tlangpui.
13. Lei laih chungchang bakah, leivung paih leh chhun zawl te pawh dan thar hian a sawi a. Hetiang ang hmun hma sawisak ngai a awm chuan, Soil Engineer-te rawih tur a ni a, AMC hnuaiah hian mi pathum rawn theih an awm.
14. In sakna tur hmunhma hi AMC Geologist Consultant ten an endik vek \hin a. AMC huamchhungah hian Local Council 84 zet a awm a, Geologist Consultant hi 2 chauh an awm thung. Dilna hi uluk taka endika chak taka hmalak a nih pawhin, a diltu duh ang diakin a kal chak thei \hin lo va, nghah theih a ngai viau. Insak kan tum anih chuan, inhmakhua lawk thiam a ngai; phalna hian kum khat chhung a huam a ni.
15. Dan tharin a rawn sawi chian ber hi insakna tur hmun hma Geologist endik hmasak ngai hi a ni a. M.Sc. Geology leh a tlukpui degree nei hlutna a sang ta hle. Geotechnical report leh lei laih enpuina tur rate hi a inanglo a, in laih dan tur hautak dan azir a ni ber, Rs. 5,000- 20,000 a ni tlangpui a, hetah hian soil endikna (test) man hi a tello.
16. Technical license holder te lawmman (rate) hi inneitute nena inbiakremna emaw, an intuk sa ang emaw a ni a. Kan inbiak tluk hma in emaw, hna an \an hma in emaw, an rate tur hi zawh lawk hmasak a \ha.
17. Building regulations-ah pawh a ni tho a, SD&SM hnuaia technical license holders- Engineer leh Geologist te hi mipui hman theih tura AMC hnuaia ziakluta inpe an ni a. Kan hriatthiam loh emaw, harsatna kan neih emaw, eng pawh, kan insakna kaihhnawihah chuan zawtfiah a, rawn \hin tur an ni a. Inhmun laih lai phei chuan, min enpui hi an mawhphurhna a ni a; chutiangin, Engineer lam mawhphurhna pawh lungrem te, in ban phun leh insak thlenga enpui hi an tihtur a ni. Inneitute pawhin hei hi hria in, technical license holder kan rawihte hi hmang \angkai ila, anmahni zai ngai leh an thu ang pawha hma kan lak a him ber ang.
    Heng a chunga point hrang hrangte hi he dan thar hman hnua in sa turte leh dil mekte zawhna tlanglawn a ni a. Chiang tawklo leh hriat thiam loh a la awm thei a, inthlahrung miah lovin AMC lama kan hotute pawh zawhfiah zel ni se la. Dan thar ngang a la nih avangin, duhthusamlo lai leh famkim tawklo lai pawh a awm ang. Mi tam tak tana phurrit pawh a ni mai thei, mahse, kan \hatna leh himna tura dan siam a ni tih kan hriat reng pawh a \ul awm e.