Aizawl: PHED E-in-C Er. C. Lalremsiama chuan tun laia Aizawl khawpui tui harsat chhan chu chawlhkar li chhung khawl chhiain a nghawng a nih thu Congress \halai hotute a lo hrilh.
MPYCC-in tunlai Aizawl khawpui veng hrang hrangah tui a haw mu mal loh thu an dawn bawhzuiin Tlawng lui tui pump tur a awm leh awm loh an finfiah hmasak hnuah tui a tam avangin an president, Dr Lalmalsawma hoin nimin khan PHED E-in-C Er. C. Lalremsiama chu a pisaah thil awmzia zawtin an kawm.
Tun laia tui harsat chhan lo hrilhfiahin Er. C Lalremsiama chuan, “Aizawl tui lak, GAWSS Phase I hi litre maktaduai 10 (mld) ni khata pump tura duan a ni a, a khawl a hlui tawh a, a phak tawh lo a. Phase II hi litre maktaduai 24 (mld) pump tura duan a ni. Phase II hi khawl pahnih, 12 (mld) ve ve niin, a pakhat zawk hi February thla khan kar li a chhia a, hei hian vawiin thlengin tui sem kawngah min nghawng a, ni khat a chhiat pawha min nghawng laiin kar li chhia hian min nghawng na hle rih a ni,” a ti.
Amah kawmtu Congress \halaite hnenah tui pump khawl chhia pakhat siam \hat a nih tawh thu leh dan pangngaiin buaina awm loa an pump mek thu Er. C Lalremsiama hian a sawi a. “Khawl chhia siam \hat hi la chhe leh thut thei a ni a, a thlakna tur hi kan chah mek a, Tlawng hi a kâm nasat em avangin Tlawng dung humhalh nan cheng vaibelchhe za lai Phase I atan project-te kan siam a. Tlawng hi a hnar lam a\anga kan humhalh loh chuan hmalakna tur a awm lo a ni,” a ti bawk.
Hetih mek lai hian, Tlawng tui a kâm zel avangin ruahmanna thar an siam mek thu sawiin E-in-C chuan, Reiek lama tuikhuaha \hal laia Dihmunzawla lak thlak theih turin survey an neih tawh thu te, hei hi an hmalakna pawimawh ber pakhat a nih tur thu leh ministry lamah pawh an thlen tawh thu a sawi.
MPYCC President pawhin, “Covid-19 lengin kum hnih tehmeuh min sawp hnuah Mizoram mipui tam takten sum leh pai leh eizawnna thlengin harsatna kan tawk mek a; chuvangin, mi tam zawk tan tui han lei maite hi thil harsa leh chhungkaw fairel bel nghawng dawt a tling,” a ti a; theihtawp chhuaha mipui harsatna sutkiansak turin a ngen a ni.
“Congress party-in tuihna humhalh a ngai pawimawh hle a, AMC election manifesto-ah pawh dah a ni. Pu Zodintluanga PHE Minister a nih lai khan tui a haw tam a, a haw ‘regular’ a, a haw hun tur pawh SMS-a hriat lawktir \hin kan ni. Khatih lai PHE minister khan Tlawng hnar chhehvela awm YMA-te thawhpuiah sawmin tui hna humhalhna kawngah hma an la \ha hle a ni,” Dr. Lalmalsawma hian a ti bawk.
MPYCC President Dr. Lalmalsawma hi a thawhpui general secretary pathum – Zohmingthanga Tlau, Lalsanglura, H.P. Lalchuailova, K. Lalthanzama leh Lalngaihawma, Secretary ten an \awiawm a ni.