Manchester City leh Liverpool inkar a zim sawt a. Premier League champion in point ruk a hma hruai leh theihna an neih an hmang \angkai thei lova. Crystal Palace lakah goal khung thei lovin 0-0 in an inhnehtawk.
Selhurst Park a Thawh\anni zana inkhelah hian City in inkhel thunun hneh hle in goal ban vawi hnih an tih per bakah defender Aymeric Laporte chuan goal ruakah a khung thei lo.
Palace khelmualah entu mipui an bengchheng a, an team in City an dang tluan a, goal nawr lamah erawh langsar taka chet an nei bik lo.
City hi point khat an hmuh avangin point li chauhin an sang fal tawh tihna a ni a, zaninah Liverpool in Arsenal an hneh chuan point khat chauh club pahnihte inkarah a awm tawh ang.
Hetihlai hian Palace hi 11-naah an la awm mek a, Patrick Vieira hnuaiah hma sawn hle in table chanve chunglam a tel ngei an inbeisei.
Palace leh Liverpool tan zan lawmawm
Kar riat kalta khan Manchester City in point 13 in hma an hruai fal a. Tunah point li chauh a ni tawh a, thla tharah hian Etihad Stadium-ah an la inkhel dawn.
A tir a\angin Pep Guardiola pawlten na takin goal an bawh a, Joao Cancelo-a’n goal ban hla tak a\angin a pet per a, ball per let Laporte-a’n a ti lut thei lo an ui ang.
Captain Kevin de Bruyne pawhin goal ban a pet per a, Riyad Mahrez leh Bernardo Silva te pawhin chance \ha hloh ve bawkin an inkhel hnuhnung 18 a\anga vawi 16 chak Man City in a pawimawh ber goal an nghei.
Blues hian tun season-ah Palace lakah league inkhelah goal an khung lova, 2-0 in Palace in October thla khan an hneh tawh.
“Ka lung a awi”
Manchester City manager Guardiola chuan inkhel zawhah a team a fak a, “Football-ah hian vanneihna avangin a kal reng theih loh. Goal khung kan mamawh a, kan ti hlawhtling thei lo.”
“Goal khung a, chhuah tlem turin kan inkhel \hin. Tun \umah goal khung lamah harsatna kan tawk. Zanina kan khelhtir team hi kan khelhtir tawh \hin an ni a. Kan inkhel leh turah pawh team ngai tho kan ni leh dawn. Sawisel tur ka nei lova, kan inkhelhdanah ka lung a awi a, player-te lak a\anga ka hmuhah pawh ka lung a awi.” a ti.