La Liga hmahruaitu Real Madrid in point 10 in an hmahruaina an ti zau a. Kartawp a El Clasico khelh hmabak club hian duhthusam a inbuatsaihna ni turin 3-0 in RCD Mallorca an hneh.
Visit Mallorca Estadi-ah Real hian chiang takin hnehna chang mahse inkhel awlsam a ni lova. League a 16-na a awm team in theihtawp chhuahin dan an tum.
First half-ah Real an hlawhchham a, mahse minute 55-naah Vinicius Junior chuan an goal hmahruai a khung hnuah erawh an tan kawng a inhawng a. French striker in a goal khung tur hi a siamsak.
PSG laka hattrick siam striker hian minute 77-naah Vinicius-a penalty hlawhchhuah chu goal-ah a khung a, huntawp hma in substitute Marcelo ball cross a tauh lut leh bawk.
Real tlarhma a inkawp pahnih Vinicius leh Benzema te hian tun season-ah La Liga bikah goal 8 tu emaw zawkin khung turin an insiamsak tawh a. Hei hi Europe a league lian zingah forward pahnih inkawp zingah a sang ber.
Real Madrid manager Carlo Ancelotti erawhin league champion lam a la sawi duh lo. “Pathianni-ah Barcelona kan tum dawn, kan chak a ngai a, kar tluana inbuatsaihna hun kan neih kan hman \angkai a pawimawh. Champions League final-ah 3-0 a hma hruai chungin a tlawm theih tih ka hria, chuvangin point 10 hian engmah a tichiang lo.” tiin a sawi.