Auto Corner
by Ruata
Maruti Suzuki leh Toyota te thawhdunnaa tihchhuah Baleno rebadge (a lirthei ngai chiah company hming chauh thlak) Toyota Glanza chu kum 2022 model tihchhuah a ni a, hei hi Maruti Suzuki-in 2022 Baleno a tihchhuah hnu lawkah an tichhuak ve a ni.
Sawi tawh angin Toyota Glanza hi Baleno ang chiah, a company hming leh thildang thenkhata Toyota hming pu a ni mai a. Hetiang chiah hian Toyota Urban Cruiser-ah te pawh a awm a, Urban Cruiser hi Maruti Suzuki Brezza rebadge tho a ni a. Toyota leh Maruti Suzuki thawhdunnaa duan vek an ni.
Toyota Glanza hi Rs. Nuai 6.39 man atangin a intan dawn a, hei hi a model hniam ber E trim a ni a, a man to ber S automatic ho chu Rs. Nuai 9.69 a ni thung dawn a ni. Hei hi ex-showroom price a ni a, kawngpuia tlan thei tur chuan hei ai hian a man hi a to hret dawn a ni. Toyota hian Glanza atan hian book hi an tlangzarh hma hretin an hawng tan tawh bawk a ni.
A chhung leh pawn
A design-ah chuan 2022 model tlangzarh thar hi a hmaa chhuak nen a danglam em em lo a, Baleno nen pawh danglamna a tam lo bawk. A lirthei lenzawng te leh thildang tam tak chu Baleno nen inang viau mahse Glanza hi Baleno aia danglam tur leh hriathran theih turin company lam chuan engtin tin emaw an design danglam ve hret hret a. 2022 Glanza-ah hian Toyota car man to Camry tea kan hmuh ang deuh grille design a awm a, a hma bumper pawh tlemin a ‘sporty’ deuh a, headlight thar LED DRL graphic mawlmang zawk an neihtir bawk a, Baleno-ah chuan three block DRL a awm a ni.
A chhunglamah pawh 2022 Baleno nen a inang viau mai a. Layered dashboard, free-standing touchscreen infotainment system leh a steering wheel design te pawh Baleno nen a inang viau a ni. Glanza-a danglam bik deuh chu a chhunglam rawngah hian rawng dum leh beige inpawlh hman
A chi hrang leh kentel te
Glanza chhuak hlui ang lo deuhin 2022 Glanza hi trim level pali – E, S, G leh V te a awm a. Glanza hluiah kha chuan G leh V trim chauh a awm a. Heti a nih chuan a man tlawm hret te pawh a awm belh leh ta tihna a ni. Maruti Suzuki Baleno lamah chuan Sigma, Delta, Zeta leh Alpha te a awm a ni.
Toyota chuan an 2022 Glanza chhuak tharah hian hmanraw changkang hrang hrang an dah leh nual a. Heng zingah hian head-up display (HUD), 360-degree camera, 9.0-inch touchscreen infotainment system with Android Auto & Apple CarPlay support, ‘Toyota i-Connect’ connected car tech, automatic climate control, steering with tilt & telescopic adjustment leh airbag paruk te a tel a ni.
Toyota Glanza hian kum 3 emaw km 1,00,000 emaw warranty coverage a nei a, hei kum 5 emaw km 2,20,000-ah a pawhsei theih bawk a ni.
A khawl lam
A khawl lamah chuan 2022 Glanza hi Baleno nen a inang chiah chiah a. 90hp power leh, 113Nm torque pechhuak thei 1.2 litre four cylinder DualJet K12N petrol khawl a hmang a. He khawl hian 5-speed manual gearbox leh 5-speed automatic gearbox te a nei a ni.
A elpui tur
Toyota Glanza hi premium hatchback huanga mi a nih hmel a. Heti a nih chuan Maruti Suzuki Baleno pawhin a el ang tho premium hatchback dang ho Hyundai i20, Tata Altroz, Honda Jazz t a rawn el ve dawn a. Glanza hi Baleno nena thu-hmun reng anga ngaih theih a ni a, hei vang hian Mizoramah chuan dealer changtlung taka awm Maruti Suzuki Baleno hi thlan mai a fuh hmel a. Hetihrual hian Toyota dealership ngei atanga Glanza ngei duh tan chuan thil buaithlak lutuk a ni chuang lo a, Mizoramah Toyota lirthei tam tak a awm mek tih te pawh kan hre theuh awm e.