Chief Minister Zoramthanga’n nimin khan Lunglei by-pass road siamna tura ruahman Sazaikawna mi chu tlawhin, a enfiah a. Minister C. Lalrinsanga, Minister of State Lalruatkima leh HPC Vice-chairman Lawmawma Tochhawng ten an \awiawm.
Sorkar thuchhuahin a tar lan danin Lunglei by-pass road hi estimate siam tawh niin Chainage 147+200 Kmp of ATL Road to Sazaikawn tia project hming vuahin, km 22 vela thui tura ruahman a ni a. Motor lian bungraw phur te Lunglei khaw chhung lut lova an tlan theihna tura ruahman a ni.
Nimin vek khan chief minister, MNF party president ni bawk, Zoramthanga chuan Lungleia MNF party pisa, Mizo Hnam Rûnah thu sawiin, MZU Southern Campus hawnna tur leh MPSC Lunglei lama hnathawk tur a rang thei anga bawhzui a nih tur thu a sawi.
Zoramthanga chuan, “Lunglei khawpui chhung kawng chhe zual lai thawm \hat hna pawh thawk thuai turin kan inbuatsaih mek a, kawng pawimawh dang sial thar hna pawh thawh thuai a ni dawn,” a ti a. “Beisei phak loh union budget-a Aizawl bypass road siamna tur leh link road siamna tur thai lan a’n ni ngawtte hi thil lawmawm tak a ni,” a ti.
RD block thar dinna tur an puan zawh chauh thu leh RD block thar nei tur Tlabung bial pawh MNF tan bial him a nih ngei an beisei tawh thu MNF president chuan a sawi a. Kum 2023-a sorkar leh turin mipuiin MNF-ah rinna an nghat nasa hle tih a lan mek thu sawiin, “SEDP hmanga hmalakna liantham bul kan \an chhoh mek hian mi dang a tizam viau mai,” a ti a. Movement an intih laia ZPM kalphung thar chu anmahniin an thlak zung zung nia sawiin, mi tam takin party-a inlet ta ZPM-ah rinna nghah har an ti tawh niin a sawi.
MNF president chuan, “Congress down lutuk hi a buaithlak a, dahkham chawi fur an ni ang tih a hlauhawm zawk a ni,” a ti a. An beidawnna a kaltluan zel chuan artelukawn mai an hlat lo niin a sawi a. BJP chungchang pawh sawiin, “Mizoram BJP lahin an pute hnenah min hek ngial mah se, kan assembly house-ah ngei an pu, India vice president chuan kan sorkar fakna a rawn sawi lawi si a. Central-in kan sorkar chungah rinna an nghat mai ni lovin, duhsaknain min vur mek zel bawk a. Selna tur dang hre loin Congress hun lai ata contract hna thawk reng tawh hmangin min bei vel mai mai a ni,” a ti bawk.
He inkhawmah hian MNF president chuan MNF party-ah mi thar lawm lutin, MNF party adviser, minister ni bawk, C Lalrinsanga leh MNF party adviser dang, Minister of State Lalruatkima ten thu an sawi bawk a ni.