Aizawl daia chhiatna thlen fona, Ngaizel kham koa lung tla \hin chungchang chu Geology & Mineral Resources department-in an zirchiang dawn a. Tun hnaiah helai hmuna lung tla avangin mi pahnihin nunna an chân phah leh.
Kulikawn veng huam chhung Ngaizel kham chung a\angin lung a tla fo a, kawngpui a hnawh pin chang te, chenna in a delh chhiat \um te a thleng \hin a. Hetihlai hian helaia lung tla \hin ve nan hmalakna lian tham a la awm lo.
Kar kalta Zirtawpni tlai khan Ngaizela, Aizawl City Bus Owners’ Association (ACBOA) office bulah kawng chhak a\angin lung a tla leh a, lung tla hian Lalchhuana, Venghnuai workshop nasa taka a den chhiat bakah bus driver MS Kamlova (43), Kulikawn veng a deng hlum.
March 25 pawh khan Kulikawn, Ngaizel kham kovah hian lung lian tak a tla a, kawngpui sira gas buaipuitu mi pahnih delhin, motor a\anga gas hlang thla kualtu helper, Nd Mortuza (27), Bihar mi chu a delh hlum tawh bawk.
Kar kalta Inrinni khan lung tlakna hmun hi Aizawl DC office hotute, PWD Aizawl South Raod Division, Disaster Management & Rehabilitation Deptt leh Geology & Mineral Resources Deptt-a mi thiamten an tlawh a, Zirtawpni tlaia lung tlakna bul kham ko chu enfiahin lung tla leh mai thei dinhmuna awmte chu an la thla a ni.
Department hotute hian Ngaizel kham kova lung tla foin vanduaina a thlen chungchangte an sawihova, helai hmun hi uluk taka zirchian a \ulah an ngai a, Geology & Mineral Resources department-a mi thiamte chu Ngaizel kham phei zirchiang tur hian an ruat a ni.
Thudawn danin lung tlakna hmun enfiahtu sorkar hotute hian Ngaizel kawng chunga lung tla \hin ven nan hmalakna lian tham zawk neih a \ul niin an ngai a, tun hnaia lung tlaknain vanduaina a thlen dante chu uluk taka chhinchhiahin sorkarah report thehluh an tum.
Ngaizel kham pheiah leimin emaw, lung tlem awmin chhiatna a thlen hian sorkar lamin hma la ve bawk mah se chhiatna lian tham a thlen loh nana hmalakna lian tham a awm ngai lo niin thudawn a ni.
Aizawl dai, Ngaizel kham a\anga lung tla \hin chungchang zirchiang tur hian kum 2016 khan study team siam an lo ni tawh a, project lian tham siam thei tur committee pawh din tum lo ni tawh mah se hmalakna lian tham erawh tun thlengin a la awm lo niin thudawn a ni.