Auto Corner by Ruata
Khawvel huapa lirthei rintlak, lar leh hlun Toyota ho lifestyle pickup truck mawi tak mai Hilux chu rei tak India ramin a nghah hnuah tlangzarh fel a ni ta a. Tun tumah hian Toyota Hilux chungchang kim lehzualin kan tarlang thei tawh dawn a ni.
Chi hrang leh a man
Toyota Hilux hi chi thum – 4×4 MT Standard, 4×4 MT High leh 4×4 AT High te a awm dawn a. A man tlawm ber hi (ex-showroom price zelin) Rs. Nuai 33.99 man atangin a intan dawn a, a to ber hi Rs. Nuai 36.80 man a ni thung ang.
Toyota Hilux hi khawvel puma kan hmuh angin lirthei hmanga adventure lama tui te tan a ni zual dawn a. Kawngchhengchhiaa tlanna tur, offroading hmanrua leh siamphung tha tak nei a ni dawn a, hei bakah hian nitin veivah nan leh thildang danga hman atana tangkai tur lirthei tha tak a ni. He pick up truck changkang leh tha tak hi kan ramah chuan Karnataka state-ah siam a ni dawn a. Siam han tih hian Hilux an duan danah hian a part zaa 70 chu rampawn atanga lakluh a ni ang a, zaa 30 chu India in a buaipui thung ang a, chutiang chuan siamchhuah ai mahin a rema rem khawm a ni ber a ni.
Elpui leh a khawl tur
Toyota Hilux hian a hmaa kan lo tarlan thin tawh angin India ramah chuan lifestyle pick up truck tha tak mai Isuzu D-Max V Cross chu a rawn el ber dawn a nih hmel a. Hetihrual hian D-Max ai chuan a thil neih leh kentelah a changkang deuh dawn a ni. Tunah hian Isuzu D-Max V-Cross hi Rs. Nuai 18.05 atanga Nuai 25.06 man vel a ni.
A khawl lamah chuan Toyota Hilux hian Toyota Fortuner khawl a tawm a, he khawl hi 2.8-litre, 4-cylinder turbo-charged diesel niin he khawl hian 204bhp power leh 420Nm torque te a pechhuak thei a ni. Transmission lamah chuan 6-speed manual leh 6-speed torque convertor automatic te a nei bawk. Automatic bikah hian a torque pekchhuah theih hi 500Nm lai a ni a, he khawl hi a chak tha viau a ni.
Toyota hian Hilux hi pick up truck a nihna angin a hnunga load rit zo thei tur leh kawng chhia tlan nan pawha offroading theihna sang tak nei turin he khawl hi an siam danglam thung a. Kawng chhe tlan nana tangkai em em differential lock chu a hnung leh hmaah a nei bawk a ni. A hma zawna kawng awih a tlan chhoh phut theihna sang ber approach angle hi 29 degrees a ni a, a hunglamin kawng chhuk atanga kawng zawl a tlan thuta a tai lohna tur angle sang ber, departure angle chu 26 degrees a ni thung a ni.
A siamphung leh ken tel
Toyota Hilux hi tui mm 700 a thukah a tlan thei a. Fortuner leh Innova Crysta te hman ang tho IMV ladder-frame chassis nghahchhana duan a ni a. A hnungah hian hmun awl, 470 litres lai a nei bawk.
India rama Toyota Hilux lo chhuak hian piano-black grille, chrome surround awm tel a nei a. LED projector headlamps neiin hetah hian tunlai lirthei tam zawka kan hmuh tawh DRL a awm tel bawk a ni. L-shaped fog lamp a nei a, a ORVM (hnunglam enna darthlalang) -ah chrome treatment kan hmu a. Hei bakah hian chromed door handle, LED tail-light leh 18-inch alloy wheel a awm bawk a ni. A chhunglamah hian hmanraw changkang hrang hrang – 8-inch touchscreen infotainment system with Apple CarPlay & android Auto support, reversing camera, leather upholstery, push start-stop button, dual-zone automatic AC, electrically adjustable driver seat, upper cooled glovebox leh heat rejection window te a awm bawk a ni.
Kimchang taka Hilux chanchin hi ziah dawn chuan a sei dawn khawp mai a. A tira kan sawi tawh angin khawvel huapa lirthei hman tangkai a ni a. Ram chhengchhe tak taka hmasawnna hna thawk tu NGO lian te pawh an hman tam a ni a, hei bakah hian offroad adventure lama tui te lei tam leh chei nasat, nitina khawpuia veivah nan pawha hman tam a ni a. Hetiang lirthei hlun leh a tha tih hun rei tak chhung lo fiah tawh lirthei tha tak India rama lei theih a ni ta hi lirthei lam ngaihventute leh lawm te tan chuan chanchinthar duhawm tak a ni a tih theih awm e.
Mizoramah hian lirthei kan nei tha tawh hle a. Khawvel huapa lar leh lirthei man to tak tak hi hmuh tur a awm zut tawh mai. Tuna Hilux an lo tlangzarh taka pawh hi a tlukpui Fortuner te kan neih tam tawh ngaihtuah chuan Mizo lirthei leitute pawhin an nei leh sup supin a rinawm.