Season harsa an hman avangin an fachuam Xavi Hernandez chu club enkawl turin an ko kir a, Barcelona in insiam\hat kawng zawhin tunah La Liga-ah pahnihna an hauh. Pathianni zanah Sevilla chu inkhel pawimawhah 1-0 a hnehin Blaugrana hian an khingpuite hi league table-ah an pel.
Camp Nou a inkhelah mikhual team hi a khel\ha lo zawkah an \ang a, an khingpuite an pha meuh lo chungin an goal erawh an veng hneh.
First half a goal a luh loh hnuah second half-ah Barca an hlauhawm zual a, chance an insiam fo a, a hmawr erawh an bawk thei lo.
Minute 72-naah an duh ber goal an khung a. An chhandamtu chu an chhuanvawr, kum 19 mi Pedri niin yard 18 a\angin defender engemaw zat a bum hnuah goal mawi a khung.
Hnehna an chan avangin Barcelona hian Sevilla leh Atletico Madrid te chu point hmuh inzat chungin an pel a. Real Madrid nen an inkarah point 12 la awm mahse khelh khatin an khel tlem zawk a. Real chetsual an chang.
Xavi hnuaiah a zawna match 14 tlawm lova an khelhna a ni a. Lehlamah Sevilla hi match 15 tlawm tawh lo an nihna chu a tawp ve chiah thung a ni.
Barca manager Xavi Hernandez chuan an dinhmun sawifiahin, “Chhiarkawp dana kan tan kawng a la inhawn chhung chuan kan bei ngat ngat zel dawn. Real Madrid hi an chetsual chiam rinawm lo mahse kan theihtawp kan chhuah dawn tho tho.” a ti.
A rawlthar Pedri chu fak bawkin, “Player \ha bik a ni a, a \hat bik chhan chiang tak chu ani anga kan inkhelh tumdan hrethiam a finna nei hi an awm lo. A goal khung lah goal mawi a ni a, khelmualah kan tana danglamna siamtu a ni. A inkhel en hi a nuam a, kum 19 chauh a la nih avangin midang nena tehkhin tum pawhin tehkhin tur an awm lo.”
“Ball shoot tam turin ka ti \hin a, mahse ball pass thiam a ni. Engtiklai pawhin ball pass dan tur, pass hlauhawm leh danglamna siam thei tur a ngaihtuah reng. Ka inkhelhlaiin tiang rilru kha ka ni ve deuh \hin. Ball a pet thiam avangin a chang chuan goal-ah risk a lak ve a ngai tih a inhre lo zawk \hin.” tiin a fak.