MNF president, Chief Minister Zoramthanga’n sorkar laipui a\anga capital expenditure hnuaia Rs vbc 400 an hmuh tur chu MLA bial tinah sem darh an tum thu sawiin, “SEDP kan sem bawk dawn nen, eptu party tan chuan huphurhawm tak kan ni,” a ti.
An party office, Mizo Hnam Rûn inkhawmah nimin khan thu sawiin, Zorama chuan Union Finance Minister Nirmala Sitharaman-i’n union budget-ah Special Assistance to States for Capital Expenditure hnuaiah Rs vbc 400 Mizoram a rawn pek tur thu telephone-in a rawn hrilh tih a sawi a, hei hi MLA bial tinah sem darh vek an tum thu a sawi.
Special Assistance fund a\anga sum an sem chhuah tur bakah SEDP hnuaia chhungkaw 60,000 emaw, 70,000 emaw, chu aia tam \anpuina pek an tum thu a sawi a, “Kan thil tih turte hi nakuma MLA inthlanpui neih tur nen phei chu eptu lam chuan a hupurh ru ngawt ang,” a ti.
Kum 2023-a MLA inthlanpui lo awm tura an party leh party dangte dinhmun tur nia an rin dante sawi tel bawkin, “Congress hi under five-ah an awm kan ring a, ZPM hi a tam berah bial 10-ah bak an tlin kan ring lo,” tiin, an party erawhin seat 30 an lak tling ngei an ring a, chutiang tur chuan hmalak an tum tih a sawi.
Mizorama politics-a an inbeih dan a hniam thu sawi tel bawkin, “Eptu lamin ruling party an beih dan hi a hniam hle a, ram din chhuahna lam hawi a ni lo,” tiin, ‘sorkar lai hnathawh dan leh development kalpui danah Zoram mipui tan a \ha em?’ tih lama insu tur zawk a nih thu a sawi.
Eptu lamin ruling beih nana an hman, Kamrula chu term hmasaa sorkarna chelhtuten an hun laia tribal certificate an pek a nih thu sawiin, an beihna dang leh, Abub Majumdar-a lah Congress sorkar laia buhfai supply-tu a lo nih tawh avanga ramri buai laia buhfai supply tura chhawr zui mai an nih thu a sawi bawk a ni.
MNF party chu intilal lo leh intodelh \hang an nih thu sawiin, “Kan zin chhuak pawh hi hruizen, suahdur leh bawngtuthlawh nen kan chhuak mai \hin. Mahni kea din tum, intodelh leh independent tum tlata kal \hin kan ni,” a ti a, miten MNF chu hun \ha lo atan Pathianin a ruat an ti \hin a, hun \ha atan pawh ruat a nih thu a sawi.
Nimina Mizo Hnam Rûna party chhung inkhawm hi MNF Vice President Vanlalzawma’n a kaihruai a, MZP Gen. Hqrs. president hlui, B. Vanlaltana, MZP Saitual District president hlui, Lalchhandama leh MZP Sub Hqrs. Lungsen President hlui, F. Lalremruata te chu Zoramthanga hian MNF party-ah a lawm lut a ni.