President thar hnuaia phurna hian a hlawhtlinpui zo ang em?
President thar hnuaiah Mizoram Congress party an phur hle a, an president ho hian Mizoram hmun hrang hrang an fangkual nual ta mai. Thusawi hrang hrangah an tih dik tawk lohnate pawmin, insiamthat an tum thu kan hre ta nual mai a, dik taka ram hruai hna thawh an tum thu kan hre chho zel ta bawk. Engtin tak nakkum MLA inthlan hunah hian mipui lamin re-action pe ang i maw?
Tunkar liamta mai pawh khan Congress party president hian mihring ngai reng hi nasa takin a insiam that theih a, nasa takin a danglam theih tih sawiin, “Kan danglam thei ang tih hi ka ring tlat. Pathian zarah kan sorkar a nih chuan a hma aia tha zawk tura insiam danglam thei miah lote chu kan mamawh dawn reng reng lo,” a ti a.
Nakkum maia inthlanpui lo awm turah an sorkar a nih chuan MLA hlawh duhtawk lote hi Congress-a an awm a tul lo tih sawiin Lalsawta hian, “Kan rawngbawlsak mipuite dinhmun hi kan ngaihtuah a ngai a. Kan rawngbawlsak mipuite rethei taka an awm laia ram hruaitute lo hausak viau hi a zahthlak,” tiin, duham hian awmzia a neih loh thu leh sum ngah lutuk hi a buaithlak thin tih a sawi bawk.
Pu Sawta hi finance a chan lai pawha hmingtha tak leh officer te pawhin a sum enkawl dan an fak a ni a, ram sum leh pai dinhmun siamtha tur hian Congress party hi an thain kan hria em? Tuna kan kal dan nen hian danglamna eng nge awm ang tih chu mipui lam chhanna tur ni ta se, president thar hnuaia phurna hian nakkum inthlan thleng daih tak ang i maw? Thlir zel phawt ang.