Aizawl: Environment, Forest & Climate Change changtu minister, TJ Lalnuntluanga chuan Serlui tuikhuah chhehvela ramngaw tihchereu zel chu humhalh thuai a \ul tih a sawi.
Kolasib district chhunga Green India Mission, Nagar Van Scheme leh Compensatory Afforrestation Fund management and Planning Authority (CAMPA) hnuaia hmalakna hrang hrang kalpui dan tur chu nimin khan TJ Lalnuntluanga hian a endik a. He hunah thu sawiin neitu nihna thinlungpu chunga Serlui tuikhuah kam ram ngaw chereu mek ven hna chu sorkar emaw, department bil tih tur a dah mai loa, mitin mawhphurna a nih thu a sawi.
EF&CC Minister hian Serlui tuikhuah chhehvela ramngaw tihchereu zel a ni chu humhalh viau a \ul tih sawiin, “A kam a\anga lei tawlh avangin Serlui Hydel Project chu hman tlak loha a awm mai a hlauhthawnawm hle a ni,” a ti.
Tuihna humhalh leh lei \ham bettu, thing phun uar zel tura mipuite ngenin, “Chhuan lo la awm zel turte tana ram nuam, hrisel leh thianghlim hnutchhiah a nih theih nan tuna hmalak hi a pawimawh a. Ramngaw, nungcha leh leilung hausakna hrang hrang humhalh kawngah kan \hanharh a \ul a ni,” a ti bawk.
TJ Lalnuntluanga hian Green India Mission, Nagar Van Scheme leh CAMPA hnuai a hmalakna tur Kawnpui, Bilkhawthlir Joint YMA park, Serlui tuikhuah leh Aitlang luite tlawh bawkin, Saiphai leh Vairengte inkar a dan loa thing leh mau tawlhruk a awm loh nan check gate ruahman dan turte, Aitlang lui, Vairengte kam humhalh tur a hmalak dan turte Forest department thawktute nen an en ho a, Botanical Garden sakna tur hmunhma an endik nghal bawkin, DFO Kolasib hmalaknain dan phal loh a ramsa kah man hal ralna hun EF& CC Minister chuan a hmang nghal bawk a ni.
Minister TJ Lalnuntluanga hi Serlui bialtu MLA Lalrinsanga Ralte, Jitendra Kumar, IFS, Principal Secretary & PCCF, Margaret Lalramchhani, IFS, DFO, Kolasib leh EF&CC Department a thawktuten an \awiawm a ni.