Chief Minister Zoramthanga chuan Mizorama chengte vanneihzia leh leilung hausakna Pathianin a pekte hai chhuaka hman \angkai lehzual a pawimawh tih a sawi.
Government Zirtiri Residential Science College-in NAAC Grade A an hmuh nimina lawmnaah khuallian niin Chief Minister Zoramthanga hian thu a sawi a. Khawvel hmasawnna kal chak tak karah hian hmathlir \ha tak neih a pawimawh thu sawiin, “Vawiina \ha leh pawimawh a kan hriatte hi kum 10 hnu lamah chuan a danglam vek thei tih hriain, kan thiamna leh theihna te hi a hun mil zela \angkaia kan hman thiam theih nan hmathlir \ha tak neih thiam a pawimawh,” a ti.
Chief minister hian lawmpuina thu sawiin, tun hmaa zirna leh tun hnua zirna a inthlauh tawhziate a sawi a. Kum 10 chhung leka Zirtiri College-in hma a sawn chakzia leh Grade ‘A’ laia a inhlang kai thei hi a lawmpui thu a sawi a. College zirlaite chu an thiamna hmang \angkai tura fuihin, hlawhtling tur chuan tumruhna a pawimawh tih hre reng turin a chah.
He huna khualzahawm, Higher & Technical Education Minister Dr R Lalthangliana chuan Aizawl khawpui \hang zelah college-te tan grade \ha nei tura campus neih \hat a pawimawh thu a sawi a. College-te khawpui pawn lam hmun remchang zawk, hmasawn thei tura hmun zau zawkah sawn chhuah zel an nih thu sawiin, Zirtiri College pawh hemi zarzotu an an nih thu leh hmasawn zel tura chahin, hmasawnna kawngah sorkar pawhin a theih ang ang tih a inhuam thu a sawi.
Dr R Lalthangliana hian lawmpuina citation college hnenah a hlan nghal a ni.
Government Zirtiri Residential Science College hian a vawi thumna atan India rama UGC hnuaia University leh College te endiktu National Assessment and Accreditation Council tehna hrang hranga an endikna paltlangin Grade A (CGPA 3.09) an hmu a ni.
Kum 2000 khan Government Zirtiri Residential Science College hi sorkar amalgamation policy a\anga lo piangin, Zirtiri Women’s College angin a ding \hin a. Mizoram sorkar hnuaia college hrang hrang a\angin Science department-te pawt khawmin Science zirna bik atana din a ni a. Mizorama Home Science zir theihna awm chhun a ni bawk.
Tun dinhmunah campus thar Durtlang Leitanah Science leh Home Science te zirna awmin, campus hlui Ramthar vengah Computer Science zirna a awm a ni.
Ramthar campus-ah hian community service centre hawngin mipuite tan kawng hrang hrangin an luang chhuak \hin a. Zirtirtu 70, thawktu dang 24 leh zirlai 914 an awm mek a ni.