Assam chuanchung lam district paliah ni hnih liam ta chhung khan pa ei sual vangin mi 13 vel an thi tawh tih Assam Medical College & Hospital Superintendent Dr Prasanta Dihingia chuan Nilaini khan a sawi.
Dr Dihingia chuan thite hi mihring tana ei him lo pa ei avanga damlo, AMCH-a an enkawl lai vek an nih thu a sawi.
Charaideo, Dibrugarh, Sivasagar leh Tinsukia district-a cheng mi 35 chu pa ei sual vang hian Assam Medical College-ah ni nga liam ta a\ang khan dah luh an nih thu leh an zinga 13 chu ni hnih liam ta chhunga an thih thu a sawi.
“Thawh\anni khan mi pali an thi a, Thawhlehniah mi pakua an thi leh a. An zavai hian pa ei chi emaw tia pa him lo ei vanga damlo vek an ni a. An ei hnu lawk a\angin an khaw hmuh fiah lovin an luak a, an pum a na zui ta vak hlawm a ni,” a ti.
Thi zinga mi pasarih, naupang pawh telin, Charaideo district-a Sonari huam chhunga mite an ni a. Panga chu Dibrugarh district-a Barbaruah huam chhunga mite niin Sivasagar district-a mi pakhat a tel bawk.
Thi tam zawk hi thingpui huana thawkte an ni tih Dr Dihingia chuan a sawi.
Dr Dihingia chuan, “Kum tin pa ei sual vang hian mi eng emaw zat damlo leh thi an awm ziah a. Pate hi ei chi a nih leh mihring tana him lo a nih hi an hre hrang mai thei \hin lo va, heng pa hlauhawm tak takte hi ramhnuaiah a to va,pa dang nen pawh a inang hle \hin a ni,” a ti.