Kum 16 chhunga a vawikhatna atan Villarreal in UEFA Champions League semi-final an khel dawn a. German champion lakah 2-1 aggregate a hnehna changin Bayern Munich an barakhaih.
Unai Emery pawlte hian Allianz Arena-ah huntawp dawnah Samuel Chukwueze hmangin an si phurh an sut a. 1-1 in an inhnehtawk a, mahse first leg-ah 1-0 a Spain a an chak tawh chu chhawr \angkai in a sang pali zingah an tel phah.
Yellow Submarines
German champion hi an mualah chak ngei tura rin an hlawh hle a, first leg an chetsual tawh avangin goal nawr nat tumin an inrem.
An tum ang erawhin inkhel a kal mai lova, uluk taka goal ven tum Unai Emery-a pawlten minute 52-naah goal an chhuah.
Bayern striker rinrawl Robert Lewandowski chuan goal a khung a, inkhel pumpui a chungnung zawk Bayern hian minute 180 chhungin an goal-ah shot vawi hnih chiah an khingpuite hian an nei a, mahse hei hi goal-ah a chang ve ve a, an tuar ta a ni.
Yellow Submarines hotupa Emery hi European football-ah mikhual a ni lova, season hmasa a Europa League ah Villarreal a hlawhtlinpui hma in Sevilla chu vawi hnih a champion pui tawh.
Tun season a Juventus paihchhuak tawhtu Villarreal hi an ram league-ah pasarihna an ni a, Bayern lakah tlarhnung an ven thiam leh a hun taka goal an nawr hlawhtlin an chak phah.
Julian Nagelsmann-a’n na taka goal nawr turin a team a rem a. Inkhelah pawh a lang. A winger pahnih Leroy Sane leh Kingsley Coman ten first half-ah ringawt ball vawi 18 an cross lut a, keeper Geronimo Rulli pel a lo ti lut thei erawh an awm lo.
Bayern goal khungtu Lewandowski-a’n tun season Champions League-ah goal 13 a khung tawh a, Villarreal hi UCL-a goal a khungna team hrang 30-na chiah an ni.
“An tuhrah an seng”
Villarreal player-te chuan Bayern Munich chuan an team an dah hniam rah an seng nia an hriat thu inkhel zawhah an sawi.
Midfielder Dani Parejo chuan, “An coach hi mimalin kan inhre lem lo, mahse first leg-ah inkhel dah\hat a duh thu a sawi khan Villarreal a zah lo hle niin ka hria. Kan tan chuan kha kha inzah lohna a tling a, a tawpah chuan khatiang \awngkam neih khan a vaw let niin ka ngai.” a ti a.
Etienne Capoue leh Gerard Moreno te pawhin sawi zuiin, “Kan mualah kan khel\ha a, khata inkhel kan dah\ha lo kha kan tihsual niin an sawi a. Khatianga \awngkam an nei khan chona nasa zawk min pe.” tiin an sawi.
An coach Emery chuan, “Pen khat zelin kan pen a, quarter-final hautak tak hnuah tun \umah theihtawp chhuah a tlin kha kan tum a ni. A awlsam lova, mahse kan hlawhtling hi thil nuam danglam tak a ni.” a ti.