Mapuia Memorial Mizoram Cricket League-ah Chanmarians Cricket Club in bul an tan that an chhunzawm a. Run 93 in Ramhlun Venglai CC an sawp.
Nilaini a Suaka Cricket Ground a inkhel hmasa zawkah Chanmarians tan Lalhruaizela bawk a che tha leh a, ball 60 atangin run 60 a siam. Opener dang Lalhmangaiha’n ball 33 atang run 41 siam bawkin bul an tan tha a. B. Lalchhuanawma chuan ball 23 atang 29 thawhin a tawp a khar a, over 20-ah run 150 an siam.
An match hmasa zawkah hnehna chiang takin chang mahse RVL in tun tumah run an siam hleithei lova. Run 16 siam Zorinpuia Hrahsel chuan an team tan a siam hnem ber.
Chanmarians Lalhruaizela’n wicket hnih a la a. Bowler dang pali in wicket khat theuh an la a, Chanmarians bowler apiangin run an pe tlem thei hle a. RVL hian over 19.5 chhungin run 57 chiah an siam.
Inkhel hnuhnung zawkah Luangmual Cricket Club in wicket 6 in Bawngkawn South Cricket Club an hneh ve bawk.
Vuak thlangtu Bawngkawn South tan Arbin Shahi chuan run 25 a siam a, over 19.2 chhungin team pumpui in run 84 an siam.
Luangmual bowler B. Lalnunfela’n wicket thum a la a, G. Lalbiakvela leh Lalrempuia ten wicket hnih ve ve an la.
Luangmual tan rinrawl Biakvela bawk bat hmangin a che tha a, ball 38 atang run 45 siamin a tawp thleng a dam a, over 15.4-ah run 88 an team hian siamin wicket 6 in Luangmual an chak. An opener Abhay Jaishi chuan run 21 a siam ve bawk.