Mapuia Memorial Mizoram Cricket League a champion inchuh tur a chiang a. Chanmarians Cricket Club leh Chhinga Veng Cricket Club ten tukin zing dar 10:30-ah champion an inchuh dawn.
Suaka Cricket Ground a final lutte fiahna hmasa zawkah chungnung taka league round khel zo Chanmarians in run 28 in Kulikawn Cricket Club an hneh.
League a match 10 chhung tlawm nei lo Chanmarians an la tlawm lo chhunzawm a. Vuak thlang zawkin over 20-ah run 151 an siam.
Lalhriatrenga’n ball 47 atang run 61 siamin a team tana run siam hnem ber a ni a. Opener Lalhmangaiha wicket hloh hma mahse opener pakhat zawk Lalhruaizela run 36 a thawh a, F. Vanlalmuanzuala’n 4 runs leh 6 runs vawi hnih ve ve a vuak chu an chhawr hle.
Kulikawn tan Mizoram junior player Sahil Reza chuan ball 45 atang run 59 siamin an beihletna a kalpui a. Amaherawhchu rei han dinpui thei a neih loh avangin an run rate a tha tawk lova, over 30-ah 123 chiah an siam a, Chanmarians an chak.
Chanmarians bowler Lalnunkima Varte leh Lalhruaitluanga Vuite ten wicket hnih ve ve an la.
Kum 2016 leh 2017 a champion Chanmarians CC in MCL trophy chawi leh theihna hun an nei.
Final a an khingpui tur hi Chhinga Veng CC hi kum 2018 champion an ni ve thung a. MCL final-ah Chanmarians lakah kum 2016 leh 2017-ah te an tlawm tawh.
Inkhel hnuhnungah 3C hian tun season a inelna hrang hranga vawi nga an hmachhawn tawh Ramhlun Venglai CC nen final luh an inchuh a. An inkhelh hmasa pali ah RVL chak zawk mahse tunkar Nilaini a an inkhelh tuma chak zawk Chhinga Veng in an hneh nawn a, run 8 in an chak.
Vuak thlang Chhinga Veng an chesual teuh a, run 34 siam K. Vanlalruata leh Gaurav Singh (28) te an out hnuah an tlu chhe teuh. Mahse innings tawp lamah Lalruatdika (22) leh Sumit Lama (21) ten an tungding leh a, over 20-ah run 127 an siam.
An player tha pahnihte NCA-ah leh IPL net bowler ni tura an kal chungin RVL in player an la nei chhe lova, an tan 127 a huphurhawm lo.
Mahse 3C bowler ten RVL an nawr na a, wicket pawimawh an la thei hle. India junior camp zawm tur K. Vanrotlinga’n run 36 a siam a, Sahil Sharma chuan run 22 siam bawk mahse over 20-ah run 119 an siam a. Run 8 in an target an tlin lo.