Jammu & Kashmir-a Kulgam district-ah Pathianni khan mi firfiak pahnih an thah a, pakhat zawk hi Pakistani Lashkar-e-Taiba (LeT)-a mi a ni tih police chuan an sawi.
Venhim hna thawktute hian thu an dawna Kashmir chhim lam district-a Cheyan Devsar huam chhungah mi firfiak an awm tih an hriat chu bawhzuiin helai hmun hi an dap zui nghal tih police thuneitute chuan an sawi.
Inkahna thlengah mi firfiak pahnih hi thah an ni ta tih a sawi.
Inspector General of Police (IGP), Kashmir, Vijay Kumar chuan pakhat zawk hi Pakistani a nih thu leh a hming chu Haider-a a nih thu a sawi.
“Pakistani mi firfiak Haider-a hi tun hnaiah Bandipora-a mi firfiakte chetna pahnihah a lo inrawlh tawh a. Nikum November 10 khan SgCT Mohd Sultan leh CT Fayaz chu amah avang hian an martar a. Kumin February 11 khan SPO Zubair Ahmad chu martar phahin BSF ASI telin police pathumin hliam an tawrh phah bawk a ni,” tiin IGP Kashmir hian Twitter-ah a tar lang.
Kumar-a chuan mi firfiak an thah pakhat zawk hi tual chhung mi, Shahbaz Shah-a a nih thu leh Kulgam-a cheng a nih thu a sawi bawk.
Shah hi April 13-a Kakran, Kulfam-a civil mi pakhat, Satish Kumar Singh-a thahnaah a inhnamhnawih niin a sawi bawk.