Basketball Federation of India chuan May 13 atanga a neih tan tur Indian Senior Men’s Basketball Team tana National Coaching Camp a tel turin Vanlalthazuala chu a ko.
He training camp hi thla khat chhung neih tur niin Bengaluru-ah Sree Kanteerava Stadium-ah neih a ni dawn a. FIBA World Cup 2023 Asian Qualifiers leh FIBA Asia Cup 2022 atana inbuatsaihna a ni ang.
Bungkawn a cheng Vanlalthazuala hi May 13 hian training camp neihna hmun turah in report tur a ni.
Pu Lalrinmawia leh VL. Remruati te inkar piang Vanlalthazuala hi Khatla TBL tana khel a ni a. Mizoram aiawhin National level inelnaah vawi engemaw zat kal tawhin kum 2012 khan Sub Junior team-ah a kal tawh a. Kum 2014 khan Youth level inelnaah kal bawkin kum 2019 khan Junior team-ah a kal leh a. Kuminah senior team-ah a kal leh bawk.
Kar hmasa Zirtapwni khan Basketball Federation of India chuan FIBA Under-16 Asian Championship 2022 atana inbuatsaihna ni turin Under 16 Boys team coaching camp a tel turin Nursery Veng rawlthar Emmanual VL Awmpuia chu a ko a. Vidyanagar, Bengaluru-ah training neiin hun an hmang mek.