AIZAWL: Lunglei district Congress committee (LDCC)-in “Congress MLA te kha Lunglei mipuiin an ngai, MNF sorkar-ah Lungleiin hmasawnna hmel a hmu thei lo” an ti.
LDCC chuan “Kum 2018 tawplama MNF sorkar atang khan Lunglei khawpui leh Lunglei dist. chhungah hma- sawnna hmel hmuh tur a awm thei lo” an ti a. “Congress sorkar-ah khan Lunglei mi, Lunglei leh chhimlam tana theihtawp chhuah thin MLA-ah thlanchhuah an ni a, Zoram pum huap pawha chhuanawm an niin, abikin Lunglei dist. chuan kan tangkaipui takzet a ni” an ti.
Multi Utility building, III Gate, Convention centre, Education complex & Guest house, Multipurpose hall, Heritage centre, Skill development training centre, Chanmari hall leh Electric veng hall (Agriculture marketing centre), Irrigation deptt office building bakah sorkar building engemawzah Congress sorkar laiin sak a ni tih LDCC chuan an sawi a. HPC building pawh a hranpa ngata sak a nih thu leh budget hranpa siam a nih thu an sawi.
LDCC chuan Congress sorkarin Lunglei dist-a hmasawnna hna a thawh te zingah thalai infiam mite tan HPC Cup, tun thlenga infiammite hlut ber pawh a nih thu te, Mizorama a hmasaberdawttu atana khelmuala phulem phah te pawh a tel thu an sawi a. “HPC fund hmanga hnathawh phei chu tunah chuan district thar ni ta Hnahthial-ah kawng zau tha tak an neih phah” an ti.
Kawlphetha lamah pawh 132 alternative line siam a nih thu te leh thil dang tam tak sawi tur a awm thu sawiin, Congress sorkar hmalakna, MNF term-a thawh tan leh la thawh tan tur te pawh a awm thu an sawi a. “Congress sorkar khan Lunglei dist tan dist dang thik tham khawpin hma a la” an ti.
MNF kaihhruai sorkar-ah chuan engkim a reh nia sawiin, LDCC chuan “By-pass road an sial thei lova, museum an sa puitling thei lova, NCC training na tur lungphum fel vek tawh pawh hma an la zui thei lo” an ti a. “Engineering college building sak vek tawh pawh an dah tawl a, Laldenga Park an hnuchhawn bawk” tiin, “Lunglei hi a hnungtawlh zawngin min kalpui” an ti bawk.