Mara Autonomous District Council (MADC) inthlana neih zawh takah party mala sorkarna siam thei an awm lo a. Nimin tlai thleng khan party pathum – Bharatiya Janata Party (BJP), Mizo National Front (MNF) leh Indian National Congress (INC) te zingah sorkar siam thei tura thawhhona siam an la awm lo.
The Zozam Times thudawn danin BJP party hian sorkar siampui turin thawhhopuiah INC hi sawm nawn lehin, nimin khan Mara District Congress Committee (MDCC) President S Hiato chenna inah an inbia a. Hetih lai hian Congress party-in CEM leh EM chanvote an phut avangin party pahnihte hi thawkho turin thutlukna an la siam thei lo a ni.
“Congress MDC-te nen kan la inberawn mek a, thawkho turin thutlukna vawiin lamah siam theih ni lo mah se, inbiakna a la kal mek zel a, inbiak fel theih mai kan inbeisei a. Chutih laiin, kan inbiakna hi thlur hnihin a kal a, a bak kan la sawi thei mai lo,” tiin nimin khan BJP party hruaitu pakhat chuan The Zozam Times a hrilh.
“MNF pawhin Congress party ticket-a thlan tlinte chu CEM te, EM te zawrhin an thlem a; chu chu Congress-in BJP an phut ang tho a ni. Mahse, tun dinhmunah BJP chuan kan la tihlawhtling thei lo a ni,” a ti bawk.
Tar lan tawh angin, MADC inthlanna neiha vote tlate May 9, 2022 khan chhiar niin, seat 25 awmah party mala sorkar siam thei khawpa chak an awm lo. He inthlanah hian BJP chu party mala seat la tam ber niin seat 12 an la a, party mala sorkar siam thei tura seat lak ngai seat 13 chu pakhatin an la phak lo thung.
BJP hnaih bertu, MNF party chuan seat pakuaah hnenah an chang a. INC chuan seat pali-ah hnehna chang ve bawkin, he inthlana bial pariata chuh ve, ZPM party leh independent-a chuhna bial ngaten seat lak an nei lo ve ve a ni.
MDC tharte vawiinah la lut dawn
MADC hnuaia Member of District Council (MDC) atana thlan tlin mi 25-te chu vawiinah rinawmna thu tiamtira lak luh an ni dawn.
MDC atana thlan thar lakluh inkhawm hi vawiin chawhma dar 11-ah Environment & Forest Hall, MADC Comlex-ah neih a ni dawn a ni.
Zirtawpni khian MADC thutkhawm hmasa ber chu nei turin ruahmanna siam a ni bawk a, hetihlai hian he thu buatsaih lai thlengin sorkarna siam tur a la chiang thei lo a ni.
Tar lan tawh thin angin, MADC inthlanpui neih zawh takah khan party mala sorkarna siam thei an awm lo a, BJP-in seat 12, MNF-in pakua, Congress-in seat li an la.
Sorkarna siam turin party hruaitute an indawr kual mek niin Siahaa chanchinbumite chuan an sawi a, thawm hrang hrang hriat tur a awm reng a, eng thu chiang mah hriat theih a ni rih loh tih an sawi.
MDC ngah ber, BJP party hruaituten sorkarna siam ngei an tum thu an lo sawi tawh a, sorkarna siam tura an mamawh MDC pakhat chu an neih theih an in beisei tih chanchinbumiten an kawmnaah an lo sawi tawh a ni.
MNF party pawhin sorkarna siam ngei tumin hma an la mek a, MNF Adviser Dr K Beichhua chuan MNF party sorkarna siampui peih tan kawng an hawn reng thu leh an inhuam san thu nimina chanchinbumite a kawmnaah a sawi.
Dr K Beichhua chuan, “Mara ram mipui hmangaihna avangin inhuamna sang tak kan nei a, hei hi a lo rem lo a nih pawhin a tul chuan opposition ni ngam turin kan inpeih,” a ti bawk.
Congress party erawh chuan sorkarna siampui turin MNF emaw, BJP emaw thawhpui loh ve ve an tum thu an lo puang ve tawh bawk a, chutihrual chuan Congress MDC-te hi sorkarna siam nana mi pawimawh an nih avangin party pahnihte hian an la hel reng niin thudawn a ni.
Naktukah MADC term thar thutkhawm hmasa ber neih a nih hma chuan sorkarna siam tur chu a chiang tawh turah ngaih a ni.