NEW AIZAWL

  • Reuben Lalnunthara Hnamte

Khawnge mahni vei zawng zawng hi han auchhuahpui ve leh thin ila, tu pawi mah kan sawi em lovang chu. Aizawl a piang chiah chu nimah suh ila, Pi leh pu atanga kan lo awmna a nih tawh avang leh, kan seilenna hmun a nih avangin ka in ti Aizawl ve viau mai a. Kan naupan ve lai leh tun te hi chu ka hisap phak bakin a changkanna leh leh mihring pun lamah pawh a sang chho chak hle a. Kan naupan lai chuan veng thenkhata mitthi emaw, sarthi kan tih ang chi te hi kan inhre pawh vek a,kan hlau thei hle thin. Tukual lui te, Chite luite npawh kha tih hunlai kha chuan sanghate manin kan cheng thin a, kan school bang Infiamna hmun ber a ni thin a, lui liantak kha ala ni a,nuam hi kan ti thei hle thin. Tunah erawh chuan a luihming chauh hi a ni tawh emaw tih mai tur a ni ta.

Aizawl hi a tir atang khan tun anga khawlian leh mihring pung tur ang hian an lo ngaihtuah ngailo em ni ang tih hi ka ngaihtuah ve mai mai thin a.Mi angin ram te fangzau nilo mah ila; khawvel hi internet khawvel a nih tawh avang leh,commnicationa kan than em avang hian khawi ram leh khua mai pawh hi kan awm hmun atangin kan lo hmu ve thei tawh a ni. Europe ram te, America ram te kan thlir chuan khawpui plan hi an lo nei tha em em mai bik a. Awmze nei leh in ang tlang tak insak leh, compound tha tak nena engkim plan vekin a awm a. Keini khawpui ve thung chu compound neih chu sawi loh, in pawh in si chet in kan sa a, a bit thei ang berin kan khawsa a nih ber hi maw.

Garrage nei mumal chu tlemte an ni a, compound nei tha tak chu chhiar tham lek an ni maithei a ni. Chutih laiin lirthei lah a ni telin a pung tual tual a, tunah chuan two wheeler tan pawh tlan a harsa ta hle mai. Kan khawpui kawngpui a zau chuang si lo, lirthei a pung zel bawk si a, a manganthlak lam chu a ni ta. Chutih laiin a khawpui chhungah kan in ek chhe beng a ni ringawt a. In insi chetin in kan sa a, ekin hmun tur takngial awmlo khawpin kan chep tawh a ni.Tui paihna tha kan neih loh avangin leh bawlhhlawh kan paih fimkhur loh avangin tuihawk a luang dul dul a, vairam kan sawi thin ang maiiin kan tuihawk te hi a tenawm zo tawh a ni.
Mi thahnem ngai ten khawpui faina kawngah theihtawp han chhuah bawk thin mahse, kan khawpui chep lutuk hian harsatna min siam a, kan changkang tawk lo nen; hmasawnna leh changkanna te a zuang chak si a, a luhaithlak ta hle. Ka hmuh danah chuan kan khawpui chhungah hian kan leng tawh lo a ni ber mai. Sorkar hmalaknain kawngchhawng ten siamin, robwayte pawh han service ta se, Aizawl khawpui ang rualrem lovah chuan enge a an ang le? Kan thawl phah ngut angem maw? Khawpuia pemlut kan awm reng a, mihring kan pung reng bawk si a, kan hmalam hun reloteah hian kawng hrang hrangah harsatna kan tawk nasa lehzual dawn a ni. In hmun zim te te nuaih tamtakin kan lei a, kan in hnawhchep tulh tulh mai chu a ni.

Ka rilrua ka lo suangtuah ve na ah chuan New Delhi te ang khuan New Aizawl siam hi a hun tawh hlein ka hria. Sorkarin khawpui zauhna turin ruahmanna fel tak siam se la; khawpui plan fel tak neiin, Sorkar hmunpui tam tak hi dah ni bawk se la.Tuna Aizawl angah hi chuan reiloteah khawsak ngaihna hi a awm lo thuai dawn. Hetianga bit lutuka kan awm hi a hrisel loh bakah, leilung chhiatna kan hmachhawn tam tulh tulh dawn a ni. New Aizawl kan siam a nih chuan europe ramte ang deuh a plan fel fai nei a, ruahman a nih chuan khawpui thar nuam tak leh changkan tak kan nei ngei ang. Miin kan bawh ruih ruih mai dawn a ni. Chung khawpui thar siam pawh chu kan luah khat rang khawp ang. Tuna kan Aizawl city anga chep tak nilova. Garrage, parking leh kawngpui nuam leh zau zawk awm thei tura kan ruahman ngat chuan khawpui nuam tak kan nei thuai ang a, tuna Aizawl te hi chu a hlui rup mai dawn a ni. Thalai lehkhathiam leh changkang zawkte hian hetiang ngaihtuahna hi kan neih a hun tawh hle.

Tuna kan khawpui hi chu chei tlak pawh niin ka hre tawh lo. Kawng zauh ngaihna a awm tawh lova, in lah a insi khup a, kawng hnaih takah in kan sa deuh vek bawk si a ni. Tuna kan khawpui chei tuma beih beih ai chuan Aizawl khawpui zawm tho si a, New Aizawl kan siam a ngai tawh a ni ber. Enge in ngaih ve dan le?

Leave a Reply

Your email address will not be published. Required fields are marked *

error: Content is protected !!