Sri Lankan-te chuan Nilaini zana President Gotabaya Rajapaksa-a’n thuchah sawia bân a tum lohna leh an ram buaina chin fel a tumna chu an sawisel nasa hle.
Thla hmasa atanga mipuiin a sorkar laia lungawi lohna an lantir hnua thuchah a sawi hmasak berah president thuneihna thenkhat pawh parliament kuta hlan a tiam a; mahse, a hun erawh a sawi lo.
Sri Lankan-te hian an ram eibar dinhmun hniam lutuk avangin bâng ngei turin an nawr mek thung.
Mi tam tak chuan a thusawi chuan an buaina ber a thelh vek niin an sawi.
“Ni 30 liam ta chhung khan khawiah ngei i lo awm? Mipuiin damdawi, ei tur an nei lo va, ram pum a ding thup asin,” tiin Colombo-a duh lohna lantirtu pakhat, Kavindya Thennakoon chuan BBC a hrilh.
“Kal dan siam that a tum dan a sawi hi kan mamawh a ni lo. Tuna kan mamawh ber chu president pisa a chhuahsan a ni a, kan buaina hi Gotabaya Rajapaksa hian a hrethiam miah lo niin ka hria,” a ti.
Social media-ah chuan kar tir lama president u, prime minister atanga bâng ta, Mahinda Rajapaksa chungchang tar lang telin, “Pakhat a tla tawh a, pakhat pet chhuah leh a ngai,” tiin Ningani zing khan Twitter-ah tar lan a ni.
“I minister leh i unaupa, Mahinda te hi hetiang hian firfiaka taka che turin ti lo la an ti lo vang. An mawl vang ni lo se Sri Lanka hian hetiang tharum thawhna hi a tawng lo vang,” tia tar lan a ni bawk.
Mipuite hian muanawm taka chawlhkar eng emaw zat sorkar duh lohna an lantir hnuah Thawhtanni khan Mahinda Rajapaksa thlawptuten sorkar duh lotute an beih atangin tharum thawhna a thleng a. Duh lohna lantirhna hmun pahnih, mi sang tel an awm khawmna an tihchhiatsak.
President duh dan
Rajapaksa hian ram mipuite hnenah hian prime minister thar, parliament kaihruai tur leh cabinet thar a ruat tur thu a sawi.
Ranil Wickremesinghe chu prime minister thar tura rin a ni a, ani hi Sri Lanka politics-a tal tam tawh niin prime minister pawh lo ni tawh a ni.
Wickremesinghe hi ruat a nih chuan an ngen angin Rajapaksa chhungkaw himna leh an tlanchhiatna tur a ngaihtuahsak rin a ni a. Hei hi eptute leh mipui pawhin an duh loh a ni.
Gotabaya Rajapaksa hian a hmain political party dangte biain sorkar siampuiah a sawm tawh a; mahse, eptuten an hnawl a, president a bân hma chu sorkarah tel an tum lo.
Thliarkar ram hian an enonomy-a $ tluklehdingawn 81 vel an neih chu a tluchhe tep a, International Monetary Fund (IMF) atanga puihna puk tumin hma an la mek bawk.