State panga inthlana an chak loh zawn hnua Congress party-in inrawn khawmna lian an huaihawt chuan party inher rem dan tur tam tak an siam a. Heng zingah hian mi pakhatin chanvo pakhat chelh (one-man-one post) chu kalpui turin an ti a. Parliamentary Board din rawtna awm erawh hnawl a ni.
Udaipur, Rajasthan-a Chintan Shivir-ah hian an party-a rorelna sang ber, Congress Working Committee chu an sawihonate thutlukna siamtu a ni a. Nikum atang tawha an party-a insiam that duha sawi chhuaktuten din tura an rawt, parliamentary board chu din loh tura thu tihtluk a ni a, state leh a laipui berah erawh political affairs committee din vek ni se an ti thung.
‘One Person One Post’ leh ‘chhungkaw khat atanga mi pakhat zel inthlan chuh’ (One Family One Ticket) erawh an pawm a. Hei hian Gandhi chhungkuaa mite erawh party-a kum nga an lo thawh tawh chuan ngaihhnathiam theih zingah an tel ang.
‘One Person One Post’ leh ‘One Family One Ticket’ dan an hman turah hian chhungkaw khat atanga chanvo leh inthlan chuh tur pakhat aia tam an awm dawn chuan chung mite chu party-ah kum nga tal an inhman a ngai tawh dawn a. Heti a nih chuan Sonia Gandhi, Rahul Gandhi leh Priyanka Gandhi Vadra te chuan inthlan an chuh thei vek tihna a ni.
Party hian ‘Bharat Joro Yatra’ pawh neih turin an rel a, hei hi district tina km 75 tal kea kal a ni a. Mahatma Gandhi piancham, October 2-ah neih tura tih a ni.
CWC hian Youth Congress chief-in Rahul Gandhi-a’n an party kaihruai leh se tia rawtna a neih pawh a hnawl.
Chintan Shivir-ah hian Congress hruaitu lawk tak tak mi 400 chuang telin party chief, Sonia Gandhi hovin Rahul Gandhi leh Priyanka pawh an tel.
Party chief hian an party chhunga huang hrang hrangah insiam that leh inthlak an ngaihna dap turin task force tha tak an siam dawn thu a sawi a. Anni hian kum 2024 Lok Sabha inthlanpui tur an thlir ang a, an party chhung, an inzar pharh zel dan tur leh an thawhpui turte pawh an ngaihtuah ang.
Ni thum awh intawh khawm kharnaah Rahul Gandhi chuan regional party-ten Congress hi luahlanin India ram puma BJP eptu lian ber an ni mai dawn nia an sawina chu a dik loh thu a sawi.
“Regional party engmahin ngaihdan bik nei party hi an bei thei lo. BJP hian regional party ni lovin, Congress chungchang an sawi thin,” a ti.