Aizawl: Indian Medical Association (IMA), Mizoram, Mizoram Government Doctors’ Association (MGDA) leh Indian Dental Association (IDA) te thawk hoin Kawrtethawveng khuaah ni hnih chhungin hlawhtling takin clinic neiin, damlo 2,210 an en.
Mipui hrisel nan ‘Zoram dung leh vang fang chhuakin’ tih thupui kal zelah IMA, Mizoram, MGDA leh IDA te thawk hoin May 12-13, 2022 chhung khan Special Multidisciplinary Clinics, Kawrtethawveng-ah an nei a. Aizawl atangin specialist doctor 24 leh pui bawmtu mi 10, a zavaiin mi 34 an kal a. He hunah hian Mamit CMO-in uapin hlawhtling takin clinic an nei a ni.
Daktawr pawl pathumte hian ni hnih chhungin Endoscopy 43, Ultrasound 203, Chhulhmawr cancer screening 35, FNAC pasarih, thisen test chi hrang hrang 187, ENT Endoscopy 45, Audiometry 28, Ha zai/phawi/filling 41 leh mit zai pahnih neiin, damlo 2,210 an en a. Damlote hnenah damdawi mana Rs 1,00,000 chuang man an sem nghal a ni.
He Multispeciality Clinics-ah hian Kawrtethawveng khua bakah a chheh vel khaw hrang hrang 14 atangin inentir turin an pan bawk.
Daktawr pawl pathum hian special clinics hlawhtling taka neih a nih theihna atana daktawr leh staff kal te, CMO Mamit te, Kawrte MO & Staff te, VC & NGO hrang hrang anmahni puitute, bialtu MLA leh a hlawhtlinna tur mi thilphal tam tak te, Clinics neih chhan ber damlo chhimtu zawng zawng hnenah lawmthu an sawi a ni.
Kumin hi IMA Mizoram Golden Jubilee kum a nih angin, hetianga an hmalakna apiang hi jubilee pual a ni nghal zel bawk.