Aizawl: Vawk pul hri, African Swine Fever (ASF) thawh hnihna leng meka tuar na ber, Farkawn khuaah ASF vangin vawk 507 a thi tawh a, kumin chhunga Mizorama ASF vanga vawk thi zawng zawng chu 2,836 a tling tawh.
AH&Vety department-in an chhinchhiah danin ASF lengin an luhchilh nat ber, Farkawnah nimin khan vawk 11 a thi belh leh a, kumin March atanga May 15 chhunga he khuaa ASF vanga vawk thi chu 507 a tling tawh a ni.
Farkawn khuaah hian chhungkua 720 vel awmah vawk vulh hi an thahnem hle a, vawk vulh zinga chhungkaw 300 zet chuan vawk vulh bul tan nan loan an la a; sum puka vawk vulhtute hriin an nuai tak avang hian an tal buai hle.
ASF tuar na zual dang, Darlawnah kumin chhungin vawk 400 a thi tawh a, Sakawrdai khuaah vawk 296 a thi tawh bawk.
Vety department chhinchhiah danin, nimin khan Mizoramah ASF vangin vawk 38 a thih belh a, hri leng thawh hnihnaa vawk thi hi 2,836 a tling tawh.
A thawh hnihnaah vawk 2,373 chu hri kai nia rinhlelh vangin suat a ni tawh a, ASF rinhlelha vawk thi chu 327 a tling tawh bawk a ni.