Pathianni khan Delhi thenawm, Gurgaon-ah chuan khaw lum lam chu 48.1°C lai a ni a, hmar lam chu khaw lumin tuam mekin hmarthlang lam pawh khaw lum hian a tuam zui dawn niin khawchin zirtute chuan an sawi bawk.
Weather office chuan Pathianni khan inralrinna tichhuakin hmarthlang lam a lum dawn a, hei hian Rajasthan pawh a huam tih an sawi.
“Rajasthan tan khaw lum lutuk lo thleng tur avangin Red Alert kan tichhuak a, naktuk (Thawhtanni) atangin Yellow Alert a intan ang. Punjab, Haryana, Uttar Pradesh, Madhya Pradesh khawchhak leh Delhi tan Orange Alert tihchhuah a ni bawk,” tiin Indian Meteorological Department (IMD)-a senior scientist Naresh Kumar chuan Pathianni khan a sawi.
Khawpui berah hian Pathianni khan Mungeshpur vengah chuan 49.2°C niin Najafgarh-ah 49.1°C a ni bawk.
“A pum puia sawi chuan India hmarthlang lam – Punjab, Haryana, Rajasthan, Madhya Pradesh leh Uttar Pradesh pawh huamin, hengte hian Inrinni khan khaw lum uchuak tak an tuar tawh a. Vidarbha-ah pawh khua a lum hle bawk,” tiin Kumar chuan a sawi.
Khaw lum uchuak tak hian hriselna pan deuh tan harsatna a siam thei a. A bikin naupang, kum upa leh natna benvawn neite tan a hlauhawm deuh thin.
“Khaw lum lo thlenna tura chengte tan hian ni sa em theih lohva awm te, thawmhnaw zangkhai inbel te, rawng zangkhai lam te, thawmhnaw thawl, cotton leh hmai leh lu khum thei puan leh nihliapte hman a tha,” tiin Met office chuan a sawi.