Congress party President Lalsawta chuan Mara Autonomous District Council (MADC)-a sorkar siampui tura party dang thawhpui loh a rel tawh hnua Congress MDC-ten MNF thawhpuia sorkar siam an tum chu an ngaih thutak thu sawiin, ‘Show Cause Notice’ pek a ngaih tur thu nimin khan thuchhuah siamin a tar lang.
Thuchhuah a siamah Lalsawta hian MADC-a sorkar siam turin Siaha lamah party indawr kualna a nasain an party pawh an bâng bik lo tih an hriat avang leh party hotute ngaihdan hriat an duh thu saw lama an hotuten an thlen avangin PAC thutkhawm hmanhmawh nei nghalin, BJP nen emaw, MNF nen emawa sorkar intawm siam chu tha an tih loh thu an hriattir nghal thu a tar lang.
“Hetiang hian tum thum kan hrilh bakah, press statement pawh kan siam tawh a. Inthlan result hriat hma pawhin hetianga ‘Hung Council’ a awm chuan hei hi kan dinna turin PAC chuan a lo rel fel tawh nghe nghe a ni,” a ti.
MADC-a BJP nen emaw, MNF nen emawa sorkar siama thawhho tha an tih loh thu hriattir an ni chunga Congress hruai sorkar, CEM pawh Congress MDC ngei awmna Joint Congress – MNF Legislature sorkar an siam thu an hre ta chu hriatthiam harsa a tih thu leh party duh dan hre reng chunga MDCC-a an hotute leh an MDC-ten hetianga sorkar an siampui lui mai hi an party chuan a ngai thutak hle tih tar langin, “Loh theih lohin ‘Show Cause Notice’ kan pek a ngai dawn a. Chumi hnuah kan hotuten kan kal zel dan tur chu an la ngaihtuah ang,” tiin a tar lang bawk.