Khaw lumin a tuam mek India ram hmun thenkhat chu Thawhlehniah pawh khan a la lum chhunzawm a. A la lum zui rih dawn niin a lang bawk.
Thawhlehniah hian Delhi-ah chuan a vawh lai berin 27.5°C a la ni a, a nih dan pangngai aiin 1°C-in a la lum.
Delhi-a khaw lum dan lakna ber, Safdarjung Observatory-ah chuan a lum lai berin 42.4°C niin a chhinchhiah a, 2°C velin a nih dan thin pangngai aiin a lum.
Hetih lai hian Karnataka hmun thenkhatah ruah tlem a sur a, Himachal Pradesh-ah vur a tla bawk.
Delhi-ah hian Nilaini pawh hian a lum lai berin 43°C a nih rin a ni a, a vawh lai pawhin 28°C vel a nih la rin a ni.
Uttar Pradesh chhimthlang lam chuan Ningani thleng khaw lum uchuak tak hi an la tuar dawn a. Bihar, Himachal Pradesh leh Maharashtra hmar lam erawh tlemin a ziaawm tawh dawn.
Madhya Pradesh hmar lam chuan Inrinni thleng khaw lum hi an la tawrh hmel a. Punjab leh Haryana hmun thenkhat pawhin Ningani atangin ni hnih chhung khaw lum uchuak hi an tawrh a rinawm a. Rajasthan pawhin tun kar tawp thleng khaw lum an la tawrh hmel bawk.
Hetih lai hian Bihar, Jharkhand leh Odisha te chuan ni li lo awm leh tur chhungin ruah, thli leh rial an dawn hmel thung.