BJP Mizoram Pradesh President Vanlalhmuaka chuan Mizoram politics-a a vawi khatnan MADC-ah sorkar siam turin MNF leh Congress an thawh dun chhan chu lalna leh thuneihna chiah an duh vang nia a lan thu a sawi.
Nimina an party pisaa mi thar lawm luhna leh political session an neihah thu sawiin Vanlalhmuaka hian MADC-ah politics vir vel nasa tak karah, sorkar siam tura MNF leh Congress party thawkdun tur chu Mizoram politics-a a vawi khat thlenna a nih thu a sawi a. “Party hian nih chhan leh din chhan kan nei theuh a; nimahsela, heng party pahnihte erawh chuan kal dan phung mumal nei loin, lalna leh thuneihna chiah duh an nihzia a lang chiang hle a ni,” a ti.
Vanlalhmuaka hian, “Mara mipuiten MNF-ah emaw, Congress-ah emaw rinna an nghat tawh loa, mipuite duhthlanna (mandate) neitu chu BJP party a ni tih seat lak dan atangin a chiang tawh a. Mipuite duh dan loin seat tlem tê chauh hmu Congress party atanga Chief Executive Member (CEM) dah a nite hian lalna chauh atchilha politics an kalpui dan a tar lang a ni,” a ti bawk.
Mara mipuiten ram hmasawnna an duh ang hi tun hunah heng party pahnih, Mizorama party inhal ber hian tihhlawhchham an tum mek tih sawiin, “Mara mipuite, MNF MDC leh Congress MDC te hian MADC-a central-in development pek an tum hi an duhpui ve ngei dawn,” tiin, sorkarna hi BJP-te kutah MDC thenkhatte pawh hian pek an duh ngei a rin thu a sawi.
Dr BD Chakma MLA, State Vice President pawhin thusawiin, BJP-in MDC member 12 lai an nei hian Mizoram mipuiten BJP-ah beiseina thar an nei tih a entir tih sawiin, “Tuna sorkarna siam tum mekte hi sorkar thianghlim lo leh bawlhhlawh tak atanga siam a ni a, hei vang hian sorkar an siam a nih pawhin rei tak an kal thei dawn lo a ni. A chhan chu assembly house-ah pawh heng party-te hi inbeina ber leh hmelma lian ber an nih vang a ni,” a ti.
Thusawitu dang, BJP State Vice Presidnet JB Rualchhinga chuan state sorkara rorel lai, MNF leh Congress party-in beihrawn thama BJP an lian ta chu lawmawm a tih thu a sawi a. Party pahnih policy nei lote hian tun hunah pawh mipui thluak suk nan MADC-ah game an play leh tawh tiin a sawi bawk.