Aizawl: Kawnpui khaw chhunga Chawke kham lung chu Ningani zanlai vel khan khan National Highway 306 kawngpuiah a tla leh a. Lung tlate hi a len em avangin then fai hleih theih a ni lo a, bomb hmanga senghawi tum a ni.
Kawnpui atanga thudawn danin Chawke kham lung hi kum tin deuhthaw a tla thin a, tun tuma tla hian a thlang lam retaining wall a tihchhiat bakah kawngpui pawh a tikhi nual a. Lung a tlak hlim hian lirthei eng emaw zah chu kaltlang thei lovin an tan phah a, chawhma khan one-way a lirthei kaltlang theih turin senghawi ni mah se he thu buatsaih lai thleng hian a puma senghawi theih erawh a la ni ta lo.
Helai kawng hi PWD National Highwway Thingdawl Sub-Dvision hnuaiah Sadhguru chuan a siam hna an thawh mek, an la zawh loh a ni a; PWD engineer-ten awmchilhin, Sadhguru lamin JCB hmangin a theih ang ang an thian fai nghal a. Khawl lian leh tam zawk hnathawhna tur hmun danga an lo inthiar chhuah tawh avangin lung tlate hi then fai zawh theih a ni lo va, khawtlang hruaitute nena ruahmanna an siam angin bomb darh mai nise an ti a, nimin tlai thleng khan bomb darh erawh a la ni rih lo.
Lung tla hian lirthei tlan vel leh mihring la delh fuh chiah lo mah se, Mizoram châk lakna kawng pawimawh tak leh a helna awm lo a ni a; harsatna lian zawk a thlen loh nana ngaih pawimawh a tul hle a ni.