Juventus in season beisei pha lo tak an hman chu tlawm result nei chungin an khar a. 2-0 in Fiorentina lakah Inrinni zanah an chak lo.
Stadio Artemio Franchi-ah Fiorentina in hnehna an chan avang hian season tharah Europa Conference League an khel pha ve dawn thung.
Mikhual team hi season thar a Champions League khel tura tling chiang tawh an ni a, an inkhel hnuhnung ber ni turah erawh first half-ah beisei an pha lo.
Fiorentina in goal hlauhawm nei thin zawkin awmze nei zawkin football an khel a, halftime dawnah Alfred Duncan chuan an goal hmahruai a khung.
Second half-ah Juve in insiamthat tumin Fiorentina striker hlui Dusan Vlahovic chu dah lut mahse awmzia a nei thui lova. Fiorentina in inkhel thunun chhunzawm zelin huntawp dawnah Nicolas Gonzalez penalty hmangin an goal hnihna an khung.
Juve coach Massimiliano Allegri chuan, “A tawp kan khar dan a chhia a, season thar kan thlir nghal ang. Point 70 hian team dinhmun tak tak a hril lem lo, mahse panna lai chu kan nei ngei e.” tiin inkhel zawhah a sawi.