Olympique Lyonnais Féminin in European football a hmeichhe inelna awptu an nihna chiang takin an lantir a. Tunhnaia an record tha avanga mi hriat hlawh Barcelona chu 3-1 a hnehin UEFA Women’s Champions League-ah an champion.
Turin khawpuia Allianz Stadium-ah final hi khelh a ni a. Barcelona hi tun season-ah match 43 atanga tlawm lo an ni mai lova, match tinah an khingpuite an hneh vek.
Nimahsela Lyon pawh hi tun season-ah tlawm nei bik lo an ni a, final inkhel pawimawhah minute 33 chhungin Barcelona an dahtha.
Minute 6-naah France defensive midfielder rinrawl Amandine Henry chuan goal mawi a khung a. Lyon in Barca tlarhnung chhaih mangang chhunzawmin minute 23-naah Champions League chanchin a goal khung hnem ber, hmeichhe football a striker ropui Ada Hegerberg chuan an goal hnihna a khung a. Real Madrid legend Alfredo di Stefano nen chiah Champions League final vawi li a goal khung thei an ni.
Minute 33-naah Lyon in Barca tlarhnung hneh taka thiat lehin Catarina Macario chuan an goal thumna a khung a. Barca tan minute 41-naah Alexia Putellas chuan goal khat khung mahse Lyon tan buaina tham a tling zo tawh lo.
Barca hian first half a goal an chhuah tirin Jennifer Hermoso hmangin chhanletna huntha vawi hnih nei mahse an khung thei lova. A tawpah erawh Lyon in kum sarih chhunga a vawi ruk nan UWCL trophy an chawi a, hmeichhe European football-ah ro an rel chhunzawm.
Lyon head coach Sonia Bompastor chu player leh manager anga UWCL trophy chawi thei hmasa ber a ni a. Lyon in he trophy vawi riat a chawi zinga a hmasa pahnihah player angin a la tel.
“Coach leh player angin a lawmawmna hi a danglamin ka hre lo. Thawhrimna avanga he dinhmun hi thleng kan ni a, hei hi kan tha leh zung kan senna chhan a ni. Inkhelh leh coaching danglamna ber chu tlemin kan thil thlir dan a dang deuh a ni mai.” a ti.