Meghalaya khawpui, Shillong daia Mawlai-a chengte chuan an khaw huam chin, arts & culture department ram chhunga state sorkarin Central Reserve Police Force (CRPF) hmun din a tum nia sawi awm chu nimin atang khan duh lohna an lantir tan.
CRPF camp nghet din tum din lohna hi Seng Samla Mawlai Pyllun (SSMP) kaihhruaia neih a ni a, Meghalaya sorkarin ruahmanna a siam chu an duh lo.
Guwahati-Shillong kawngpui âna Mawlai petrol pump intawh khawmnaah mi thahnem tak an pung khawm.
Duh lohna lantirna hmunah hian venhimna pawh khauh taka kalpui a ni nghe nghe.
Ruahman dan chuan nimin kha ram thlithlai fel ni atana ruat a ni a; mahse, SSMP-in duh lohna an lantir avang hian thulh rih a ni.
SSMP president, Samuel Biam chuan state sorkar hian Mawlai Nongkwar-a ram, arts & culture department-in amphitheatre pakhat a dinna len zawng chu a hre sa reng niin a sawi.
“Arts & culture-in in sa duh sela awlsam takin DPR leh architectural design an siam thei ang. Ram teh a ngai an ti hian a phenah eng emaw tak a awm tih a chiang a ni,” tiin Biam chuan a sawi.