Assam-Tripura ramria Churaibari check post-ah LPG phur truck 100 chuang zet chu a khalhtuten nawrh an huaihawt avangin an ding mek.
Truck khalhtute hian Churaibari check post-ah hian Tripura Chief Minister Biplab Deb-an tun hnaia an state-a truck lut zawng zawngte chu an rih zawng buk vek tura a tih duh loh lantir nan ‘chakka jam’ an huaihawt mek.
Chief Minister Deb hian tun hnai khan Assam nena an inrina laia Churaibari check post hi tlawhin thuneitute chu ramri kân lirtheite chu uluk taka endika an rih zawng pawh buk vek turin a hriattir.
Chief minister thuchhuak hi truck khalhtute chuan an duh lo tak zet a, lungawi lohna an lantir.
Truck khalhtuten Deb-an thu a pek hi sut a nih hma loh chuan tiam chian nei lovin nawrhna hi an lantir mek.
LPG phur khalhtute hian Deb-a thupek chu ni hnih ni thum vel lai rit tak phura an inkhalh hnuah ramri luh dawnah rei tak indintirna leh theihna a nih thu sawiin, inhremna anga an ngaih thu an sawi.
Chakka jam hi truck khalhtute hian Thawhtanni atanga an tan kha niin nimin kha a ni thumna a ni tawh.
Hetih lai hian Tripura DIG LM Darlong leh North district SP Bhanupada Chakraborty chu Churaibari check post-ah hian kalin thil awm dan an thlithlai.
Churaibari Police Station OC Jayant Das pawh truck khalhtuten lungawi lohna an lantirna hmun hi tlawha thlem lungawi dan ngaihtuah tura hma la tura tirh a ni bawk.
Truck khalhtuten hian OC hi tha takin an lo bia a; mahse, an thil phut a hlawhtlin hma chu din an tum thung.