Congress hruaitu, Navjot Singh Sidhu chu kum 1988 daih tawha dan a bawhchhiat avangin kum khat lung in tang turin Patiala Central Jail-ah a awm mek a, a hriselna dinhmun avangin Thawhtanni zing khan venhimna khauh tak hnuaiah Patiala-a Rajindra Hospital-ah hruai a ni.
Cricketer atanga politician ni zui ta hi a dan hre mi, HPS Verma chuan tan inah hian a bik taka ei tur duan (special diet) pek a ngen tih a sawi a. Board of Doctors-in damdawi ina a inentirna dinhmun hi ngun zawkin an zir leh dawn tih a sawi.
“Board of doctors hian special diet mamawh a ni em tih te an en dawn a, an thil hmuh chu Patiala court-ah an thehlut ang,” tiin Verma chuan a sawi.
A sawi dan chuan Sidhu-a hian wheat, thil thlum, maida leh thil dang ei theih loh a ngah a. “Berry, thingfanghma, kawlthei, bawnghnute leh fibre leh carbohydrate tel lohna chaw chauh a ei thei,” a ti.
Kum 58 mi, Congress hruaitu hi hrisel lohna nei ve neuh neuh a ni a. Kum 2015 pawh khan Delhi-ah acute vein thrombosis (DVT) vangin enkawl a ni tawh.
DVT hi thisen zam thuk taka thisen khalin a siam a ni a, thisen kal pangngai tibuai thei a ni.
Rajindra Hospital thlenpui a nih veleh hian Congress hruaitu eng emaw zat an thleng ve nghal a. Punjab Congress chief hlui hi May 20 khan a inpek hnuah Patiala central jail-ah dah luh a ni a. Supreme Court chuan 1988 road rage death case an tihah thiam loh chantirin kum khat tang turin a hrem a ni.