Iranian president chuan Pathiannia an khawpui, Tehran-a an rama venhim hna thawktu thiltithei tak, Islamic Revolution Guard Corps (IRGC)-a an colonel kah hlum tak phuba chu an la ngei dawn tih a sawi.
Sorkar chanchinbu chuan Sayad Khodai-a hi motorbike-a inphur mi pahnihin a chenna in kawta car-a a chuang chu an kap hlum niin an tar lang.
Col Khodai-a hi IRGC hnuaia ram danga ralthuam nena che thin nia hriat, Quds Force an tiha member niin an sawi.
President Ebrahim Raisi chuan ‘khawvel nunrawng takte kut thawhna’ niin a sawi a, hei hi United States leh a thawhpui ramte a tihna a ni.
“Venhim hna thawktu zinga hotute chu ngun taka chhui turin ka ti a, martar zahawm tak thisen thianghlim a luanna hi thamral mai lovin phuba lak a ni ang,” a ti.
IRGC thupuangtu, Ramazan Sharif chuan Col Khodai-a ‘martarna’ chuan an tum ber, ‘invenhim, mahni kea din, ram tana tha tur tih leh Iranian-te ram hmelma laka na taka chetna’ kawngah a tichak sauh niin a sawi ve bawk.
Khodai-a thattu-ah hian khawi ram leh eng pawl mahin an tihah an la chhal lo va. Amah hi Iran November, 2020-a Tehran daia nuclear scientist Mohsen Fakhrizadeh kah hlum a nih hnuah chuan an rama mi langsar ber a ni.
Fakhrizadeh-a hi Israel thahah an chhal a, anni erawh chuan an tih a nih thu emaw, a nih loh thu emaw an la sawi lo va. Hetih lai hian nikum khan Mossad intelligence agency hotupa thin chuan kum tam tak chhung an thah tum a lo ni tawh thin tih a sawi chhuak.
Iran sorkar news agency, Irna chuan Col Khodai hi Pathianni tlai dar 4:00 (India sanaa tlai dar 5:00) vel khan Tehran khawchhak lama a car atanga a chhuak tur chu kah niin silaimu panga a taksaah a lut tih an puang.
Thlalak an tihchhuahah chuan Kia Pride car khalhtu thutnaah mi pakhat bawksawp a lang bawk a. A khalhtu bula thutna tukverh chu a keh bawk.
Irna hian Quds Force-a Khodai-a inrawlhna hi engmah a tar lang lo.