Manchester City Premier League champion ni turin minute nga chhungin goal thum an khung a. Pathianni zana Premier League season tawp ni a intlansiak hmuhnawm leh ngaihnawmah hlawhtlinna changin a vawi ruk nan Premier League title an chawi.
Pep Guardiola pawlte hian season nga chhunga an Premier League title vawi li chawina turin hnehna chan an mamawh a. A tawp ni ah an kut a awm tawh Premier League trophy an chan mai dawn a ang hman.
Aston Villa an hmachhawn a, Villa manager Steven Gerrard-a club hlui Liverpool in City hi ngawrh takin an um ve thung.
Villa in minute 37-naah Matty Cash hmangin goal an khung a, hei hi minute 69-naah Philippe Coutinho chuan Villa tan chhunzawmin 2-0 in hma an hruai.
Mahse City in minute 70 chhung beisei an phak loh hnuah harhchhuakin a tawp minute 20 chhung hneh takin Villa an nawr a, minute nga chhungin goal thum an khung.
Minute 76-naah Bernardo Silva thlaktu Ilkay Gundogan chuan an goal hmasa ber a tauh lut a, Etihad Stadium thawm a ring. Rodri-a’n minute 78-naah a chhunzawm a, minute 81-naah City in chakna goal khungin Gundogan-a’n an goal thumna a khung.
Inkhel lehlamah Liverpool in Wolverhampton Wanderers an mikhual a. Pedro Neto chuan minute 3-naah Wolves tan goal khung hmasa zawk mahse Liverpool in minute 24-naah Sadio Mane hmangin an sut a, minute 84-na leh 89-naah Mohamed Salah leh Andy Robertson ten goal an khung a, 3-1 in an chak.
City in point hloh se Liverpool tan trophy hlawhchhuah a ni dawn a, mahse City an chak avangin Liverpool in point khatin an elpuite an pha lo chiah.
Champion zia ngei chu
Coutinho-a goal a luhin Manchester City tan mang chhe ber a tak ramah a chang mai dawn a ang hman. Minute 21 chhungin goal thum khung an mamawh.
Gerrard leh Coutinho te vangin inkhel boruak a ngaihnawm leh zual a, mahse danglamna intan dan erawh Rodri a ni a. Spanish midfielder in goal a khung hnuah City an harhchhuak.
Hemi hma zawng hian Aston Villa an fakawm a, nidang ang lo takin goal nawr a nung lova. Villa in an tlarhnung an tihthaih ngun.
Kum 37 mi Fernandinho chu Villa in an bitum fuh a, game plan tha tak neiin goal hnih a hma an hruai theih chhan a ni.
A tawpah erawh a tawk zo lova, minute 20 chhung City in theihtawp an chhuah chu an dawl zo lova. City in goal khat an khung hnuah goal rim an hre laklawh a, Villa tlarhnung a kehchhia.
“Legend an ni”
Manchester City manager Pep Guardiola chuan a team in kum nga chhunga a vawi li nan Premier League title an chawi hnuah a player-te chu club legend an nih thu a sawi.
“Hriatreng kan ni tawh dawn a, legend kan ni ang. He club chanchinah hian heng player-te hi hriat an ni reng tawh dawn.”
“Tuna kan hlawhtlinna hi thil tih harsa tak a ni a, Sir Alex Ferguson khan Manchester United-ah vawi hnih thum vel a lo ti tawh thin a, tunah heng zingah hian kan tel ve thei a ni.” tiin an hlawhtlinna chungchang a sawi.
Liverpool boss Jurgen Klopp chuan, “Kan theihtawp tak tak chhuah bak tih theih kan nei lova, zaninah pawh kan nauten theihtawp an chhuah. Khawvela team tha ber a tawp thlengin kan nawr a, hei hi thil ropui tak a ni. Kan insiamtha anga, kan inum leh ang.” a ti.