Aizawl: HSLC result tihchhuah taka zirlai hlawhchham awm lohna, 1st MAP English Medium School-in pass lawmna an buatsaihah Aizawl East II bialtu MLA Robert Romawia Royte-in khuallian niin a hmanpui.
He hunah thu sawiin bialtu MLA, Sports Minister Robert Romawia Royte chuan 1st MAP English Medium School tana MLA a nih hma atang tawha theihtawp a chhuah tawh thu a sawi a. Nikum leh kum hmasaa HSLC exam an hmachhawn vawi hnihah an zirlai zaa za an pass ve ve chu a lawmpui thu a sawi.
Khuallian hian Mizo nu leh paten state pawna an fate zirna atana sum sen an inhuam anga state chhunga an fate zirna sum senso atana an inhuam chuan tun aia sikul tha hi Mizoramin a neih a rin thu a sawi.
Bialtu MLA hian sikul hmasawnna tura kawng hrang hranga tanpui a inhuam thu te, sikul naupang an thathnem avanga classroom siam belhna tur project siama sum a zawnpui tur thu te, Lumpsum Grant status maia ding an nih avangin MLA Fund atanga thla tin Rs 15,000-a a puih tur thu leh zirtirtu mi 21 tan uniform man tur Rs 5,000 theuh a tumsak tur thu te a sawi bawk.
Result lawmna inkhawmah hian Christina Roluahpuii Sailo, Councillor, AMC Ward VIII chu khualzahawm niin thu a sawi bakah computer set a pe a; Lalringdika, MPS, Commandant, 1st MAP leh School Management Board Chairman te pawhin thu an sawi a ni.
He sikulah hian zirlai 253 awmin zirtirtu 21 an awm mek a, kumin HSLC-ah zirlai 12 exam-in an zavaiin an pass vek a ni.