Serchhip Dinthar venga mi, Zobiaksanga, kum 34, chuan an chenna inah a nupui nasa taka sawisain a that zui nghal nia hriat a ni a. Serchhip police-te a hmunah kalin an man nghal.
Pathianni tlai dar 3 khan Zobiaksanga hian an chenna inah a nupui, Rosangzuali chu nasa taka sawisain a that zui nia hriat a ni a. Rosangzuali hi a hnar leh a ka, a tukhum atangtein thisen a chhuak nasa hle.
Tualthahna hmunah Serchhip Police-te rang taka thleng nghalin Zobiaksanga hi an man nghal a, Serchhip mipui thahnem tak tualthahna kawtah hian pungkhawm nghalin thil duhawm lo thleng zui erawh a awm rih lo.
Zobiaksanga leh Rosangzuali te hi kum 2020 khan inneiin fa pahnih, mipa kum thum mi leh hmeichhia thla ruk mi an nei tawh a, Serchhip Dinthar Venga a pate in sak thar hnuai luahin tun hnai khan an indang a, an indanna pawh hi chawlhkar hnih vel awrh niin Zobiaksanga pa, PC Vanlalawia chuan a sawi.
Zobiaksanga te chhungkua hi Serchhip Dinthar Presbyterian Kohhranah an lawi a, tunlai hian speaker ruaiin crusade an nei a, nimin chawhma pawh khan a nupui chu a la inkhawm.
Tlai dar 3 vel khan Zobiaksanga hian in chunga a nau mipa rawlthar chu phone a koin an ina chhuk thuai turin a hrilh a, a nau chu in hnuaia a chhuk chuan Rosangzuali hi mut pindana an khum bulah zangthal zawngin a lo muin a ka, a hnar leh a tukkhum atangin thisen a chhuak nasa hle a, a mar pawh a lo awm tawh lo a. Zobiaksanga chuan a lo bawihsawm mek a, a sirah chuan an fate pahnih chu tap tuar tuar chungin an lo awm bawk.
Hemi hnu hian Zobiaksanga nau chu rang taka tlan chhuakin a nu leh a pa inkhawm pun turin an in atanga hla vak loa awm an biak in lam panin a tlan thla nghal a. Biak in a thlen chuan an lo bâng hman chiah chiah a, thil awm dan chu a pa Vanlalawia hrilhin an thenawm khawveng leh a hria apiang an tlankhawm nghal bawk a. Police hrilh thuai niin OC hoin an thleng nghal a, Zobiaksanga pawh an la nghal a ni.
Zobiaksanga te in chhungah hian thisen a per darh nasa hle a, an choka chhuatah te, an pindan bang leh purdah zarah te, an verandah thlang lam kawngkaah te leh chhuatah te, mut pindana an nupa khumah te thisen hi a kai nuaih hlawm a ni.
Zobiaksanga hi ruihtheihthil chi hrang hrang – zu, drugs leh dendride thlenga ti thin niin a thenawm khawvengte chuan an sawi.