China chuan India hmarchhaka lui pawimawh tak, Brahmaputra chu khuaha hydropower project lian tak kalpui a tam a. Hei hi Arunachal Pradesh zirlaite chuan an duh lo va, sorkar laipui pawhin ngaihven se an duh.
China hian Brahmaputra lui hi Tibet ram chhungah, an rama 14th Five-Year Plan hun chhunga khuah an tum a. Nakum atang hian hna tan an tum nia sawi a ni bawk.
All Arunachal Pradesh Students’ Union (AAPSU) chuan hei hi tha an ti lo tih an sawi a. AAPSU-in vawiina thuchhuah an siamah Global Times-in he mi chungchang a chhuah chu an ngaihvenin anngai thutak hle tih an sawi.
Global Times hi Chinese sorkar chanchinbu, an tlangau ber a ni.
“Kum tam tak kal tawh atang khan ramri-ah hian chetna lian tam tak an lo nei tawh thin a, AAPSU chuan heng thil hi state leh sorkar laipui hnenah pawh a hriattir tawh thin,” tiin AAPSU chuan an thuchhuahah an tar lang.
“Kum 2018-a New Delhi-a union home minister a nih laia Rajnath Singh kawm tum khan hrilh a lo ni tawh a, khauh takin Chinese-ten Siang River vela an chetna chu duh lohna lantir a ni a. Sorkar laipui hi China chet danah hian hma la turin kan ngen a ni,” a ti.
Chinese-ten Brahmaputra khuah an tumna hi Arunachal Pradesh, Assam leh Bangladesh ram thlengin, hmun hniam laia khawsate tana hlauhawm thei tak tur a ni a. Hei bakah hian helai bawra khuarel thil tichhe thei tura ngaih a ni bawk.
AAPSU hian October 2018 khan Siang River chu a kangchat tep tih sawiin hei hi Chinese-ten isocyanate (C6 H9 O2 N2) an hman nasat vang niin an sawi a. Isocyanate hi thil lian tham saknaa thil puak thei atan hman thin a ni.
“A hun lai khan sorkar laipui chuan kan thu thlen a ngai pawimawh lo va, khuarel thil, dil siam chawp leh chhan hrang hrang vangah an puh,” an ti.
“Tunah erawh chuan Chinese sorkar tlangau chuan ramria chetna lian an nei leh ta tih a tar lang a. AAPSU chuan he thil hi na taka chhan let kan phut tlat a ni,” an ti.
AAPSU general secretary Tobom Dai chuan China nena water treaty an siam chu Arunachal Pradesh state-in an tawrh lohna tura kalpui tura tih a nih thu an sawi a, “Hei hi Siang/Brahmaputra chungchang chauh a ni lo va, ngaihven a ngai,” tiin a sawi.