Europe leh South America champion te an inkhel a. South America khawmualpui a lallukhum khumtu Argentina in team tha tak an nei a, kumin World Cup-ah pawh an huphurhawm dawn tih lantirin Italy 3-0 in an hneh a. Chungnung takin an khingpuite an hneh.
Wembley Stadium-ah inkhel tir atanga a tawp thlengin Argentina a tang mar a. Ball thununtu an nih bakah a hmang thiam zawkah an tang a. Thiampuipa Lionel Messi leh rinrawl dang Angel di Maria te an tal na.
Messi-a’n minute 28-naah Italy tlarhnung hneh taka thiat in Lautaro Martinez goal khung tur a siamsak. Martinez hi a siamsaktu ah tang zui ve lehin minute 45-naah Angel di Maria goal ‘cial’ tak khung turah a pawimawh.
Second half-ah pawh La Albiceleste bawkin an khingpuite an nawr tam a, Italy an insiamtha thei lo. Argentina substitute Paulo Dybala chuan huntawp dawn lamah an hnehna tichiang turin goal thumna a khung.
He inkhel first half hi Italy rinrawl defender Giorgio Chiellini chuan khel tluanin ram tana vawi 118 a inkhelhna a ni a, ram tana a inlan hnuhnun ber tur a ni.
He inkhel hi kum 29 hnua European champion leh South American champion ten an khelh leh hmasak ber a ni a. Kum 1985 khan Artemio Franchi Cup tia hming fuahin khelh a ni a, France in Uruguay hemi tum hian an hneh. Kum 1993-ah khelh ni lehin Argentina in Denmark chu penalty hmangin an hneh ve thung.
Argentina an tha
Argentina hian khawvel huap a player langsar kawl thin mahse team inkhairual an ni lo leh thin a, hei vang hian beisei an pha lo leh thin.
Nimahsela kum 2018 November a Lionel Scaloni hnuaia an inkhelh thin hnuah erawh kawng dik an zawh a, kum 2019 June thla atangin tlawm nei lovin match 32 an kal tawh.
Kum 1993 hnua a vawikhatna atan Copa America an chawi a, tlarhma a player an neih that chu a hnung lama dawltu tha ten an pawlh tawh a. Midfield-ah Guido Rodriguez hma a Rodrigo de Paul leh Giovani lo Celso te hna thawh hmuh hmaih theih an ni lo.
Scaloni erawh a tawng fimkhur a, “Ram dang, team tha nei turte nen kan danglamna a awm lo. Team tha kan ni a, theihtawp chhuahin kan inel ang. Mahse World Cup hi chu inelna dang nen a inang lo hle.” tiin a sawi.