Tulsa, Oklahoma, United States-a damdawi in pakhata mi pakhatin silai a hmeh puahah mi pali an thi tih police-in an sawi.
Officer-te chuan silai hmet puaktu nia hriat, rifle leh handgun kengtu pawh a thi bawk niin an sawi.
Nilaini chawhnua St Francis Hospital-a inkahna thlengah hian silai a puah tan atanga minute thum lekah police an thleng a, thi an awm belh a rinawm loh niin an sawi.
Thuneitute chuan hliam tuar eng emaw zat an awm bawk tih an sawi.
Nilainia thuthar lakhawmtute a kawmnaah Deputy Police Chief Eric Dalgleish chuan, “Civilian mi pali an thi tih kan hre tawh a, silai kaptu ber pawh a thi,” a ti.
Silai kaptu nia an puh ber hi tunge a nih hriat a la ni lo va, a taksaah silaimua hliamna tam tak a awm a, amah leh amah a inkahna nia ngaih a ni.
“Kah hlum a nih lai hian silai sei chi pakhat leh hand gun pakhat a lo keng a ni,” a ti.
Hetianga a chet chhan hi hriat theih engmah an la nei lo bawk.
Deputy Dalgleish chuan police hian silai hmet puaktu an awm tih hi an ram sanaa tlai dar 4:52 (India-a zing dar 2:22)-ah an hriat thu leh minute thum chhunga an thlen hman thu a sawi.
“A thleng hmasa officer-te chuan building chhunga silai puak ri an hria a, chhawng hnihna a ni,” a ti.
Officer-te hian building chhunga awm, thil thleng hmutu, a bikin silai a puahna, chhawng hnihnaa awmte chu an kawm kual mek tih a sawi bawk.
ABC News-in an kawmnaah Captain Richard Meulenberg chuan police-ten medical campus an thlen lai hian ‘mi thenkhat kah an ni tih an hmu nghal’ niin a sawi a, thenkhat phei chu an lo thi tawh niin a sawi.
“A rapthlak hle a ni,” a ti.
US President Joe Biden chuan Tulsa-a inkahna thleng pawh a tih thu a sawi a White House thuneitute pawhin thuchhuah an siam bawk.
Inrinni khan President Biden-a hian American-te chu silai chelekna titawp tura an aw chhuah turin a lo sawm tawh a, hei hi Texas-a sikul pakhata naupang 19 leh zirtirtu pahnih kah hlum an nih hnu lawka a sawi a ni.