Assam chuan chung lama Dibrugarh district, Duliajan-a Bhadoi Panchali-ah chhungkuaa mi pathum chu tûr an ei avangin an thi.
Thite hi Sanjay Panika, Atula Panika leh Dipamoni Barik te an ni.
Anmahni hi tea tribe an tih hnam an ni.
An chhungkua hian chappatis an ei hnu lawkah an damlo ta niin sawi a ni.
An lu a hai a, an luak a, an pum a nat tak chiam avangin Thawhtanni khan Tengakhat-a Mahatma Gandhi Model Hospital-ah hruai an ni.
Damdawi ina enkawl an nih lai pawh hian an dinhmun a hniam hret hret zel a. Enkawlna tha zawk dawng turin Assam Medical College Hospital (AMCH)-ah sawn an ni a, nimin khan an chhan zo ta chuang lo a ni.
Police chuan an chenna in vel an dapnaah an huanah gallon hnih zu an bilh (bootled liquor) an hmu chhuak.
Zu hi hmu chhuak tawh mah se an thih chhan hi zu chhia an in vang a ni ngei tihna a nih loh thu police-te chuan an sawi a. Thil dang pawh a ni thei tih an sawi.
An chaw ei leh an zu hmuh chhuah chu endik turin laboratory-ah thawn a ni tawh.
“Kan hriat chin leh kan chhui chinah chuan chhungkaw khata mi pathum hi roti (chappati) an ei hnu lawkah an damlo zui ta tih zawng hi a la ni rih,” tiin Kameswar Gogoi, Bhadoi police outpost in-charge chuan a sawi.
“Pathianni zan dar 10:00 velah khan chappati hi an zanriah atan an ei a. A tuk (Thawhtanni) zing dar 5:00 vel khan an awm a nuam lo ta a, damdawi inah hruai an ni a, Thawhlehniah an thi ta a. Sample laka endik a ni ang a, chhui zui zel a ni ang,” a ti.
A ruang pawh endik zui a ni dawn bawk.