Aizawl: Congress thalai chuan Mizoram mipui hmaa kalphung thar nei tura inzuar, ZPM chu eptu party an nih lai atangin anmahni kalphung duan bawhchhe nghalah an puh.
Thuchhuah an siamah MPYCC chuan local TV pakhatin an kawmnaa ZPM President Lalliansawta’n Val Upa Council thuchhuak chu ZPM an sorkar huna zawm tur a nih thu a sawi chu, a thusawi atanga a lan dan hi chuan ZPM atang hian kalphung thar pakhat mah hmuh tur a awm lo tih an sawi.
ZPM Val Upa Council (VUC)-ten MLA hlawh tihpunte leh MLA-te motor thar lei lo tura ro an rel zawng zawngte chu an MLA-ten an bawhchhia tih an sawi.
“Hei hian rorelna fawng vuan tlak an nih lohzia nasa takin a pho lang nghal a ni,” MPYCC hian an ti.
Congress party chu President Lalsawta hoin ‘That Loh Theih Lohna Bawm’ hmangin eptu party an nih lai atang pawhin nasa takin an insiam tha mek tih an sawi a. Sorkarna an chelh leh hunah pawh chu ‘system’ tha hmangin Mizoram kaihhruai an tum thu an sawi bawk.