Argentina leh Premier League striker ropui thin Carlos Tevez chuan professional football a chawlhsan thu a puang.
Kum 38 mi ni tawh Tevez hian nikum June thla khan a seilenna club Boca Juniors chu a vawi thumna atan a chhuahsan a. Hemi hnuah hian club dang zawm a la nei leh lo.
Tevez chuan a chawlh chhanah hian nikum February thla a Covid 19 avanga a pa in a thihsan chu chhan lian tak a tling a. Kum 20 chhung football-ah theihtawp hlanin a bei tawh a, tunah chhunzawm tura sawmna hmu nual mahse a rilru lamah chhunzawm zel tura a inpeih tawh loh thu a sawi.
“Ka inkhelh tawh loh chhan hi min tantu leh thlawptu lian ber a awm tawh loh vang a ni.”
“Ka chawl tawh a, he thutlukna hi a chiang tawh. United States te leh hmun dang atangin sawmna tha tak tak chu a awm, mahse ka duhtawk tawh a, ka theihtawp ka hlan tawh.” tiin Tevez chuan a hma hun a sawifiah.
“Nikum a inkhelh chhunzawm zel pawh kha a awlsam tawh lo hle.” tiin a sawi bawk.
A vanglai a Premier League striker hriam leh taima hian England-ah West Ham United, Manchester United leh Manchester City tan a khel hman a, Premier League bikah match 202 khelin goal 84 a khung a, midang khung tur vawi 41 a siamsak.
Premier League trophy vawi thum chawiin FA Cup leh Champions League vawikhat a la bawk.
Juventus lamah kalin Italy-ah hian season hnih a cham chhungin Serie A vawi hnih leh Coppa Italia a la a, an tan match 96 atangin goal 50 a khung a. Boca Juniors tan match 200 a khel hman.