Golden State Warriors in anmahni court-ah ngei game 1-ah fourth quarter a an tluk chhiat avangin an tlawm chu thlen nawn tir an tum lo bur a. Thawhtanni zingah NBA Finals game 2-ah Boston Celtics chu 107-88 a sawpin an chhanglet a, 1-1 in an intluk mek.Chase Center a inkhelah a tir minute 24 chhung chu team pahnihte an intluk a. Point in score chhawk in an intlansan hleithei lo.
Third quarter-ah erawh Warriors an inthing harh a. An ball shoot theihzia lantirin point 35 an score laiin Celtics in 14 chiah an score a, a tawp thlengin an buai phah tawh lo.
Golden State hian Stephen Curry chuan point 29 score in assist vawi li leh rebound vawi 6 a la a, an team hmahruaitu a ni.
Game 1 a khelh that loh avangin sawisel zinga tel Jordan Poole chuan bench atangin point 17 a thawh a, team a mi tangkai niin a ball shoot theih an chhawr.
Warriors chak chhan lian tak hi Game 1 a an tih theih lohah an insiamthat vang a ni a. Boston hi turnover vawi 18 neih tirin defense an kheltha hle a. Heta tang hian point 33 an score theih phah.
Celtics tan Jayson Tatum chuan point 28 leh rebound vawi 6 a nei a. Hei hi hnehna chan nan a tawk lova, Celtics player dangte zingah point 10 aia tam score thei pahnih chauh an awm.
Warriors hian game 1 a Celtics chakpuitu Marcus Smart, Al Horford leh Derrick White te ball shoot tur chu tun tumah awmze nei zawkin an veng thei a. Tun tumah hian Celtics in 3 points vawi 33 an shoot atangin vawi 13 chiah an lut a, a bikin 2nd half quarter pahnihah an zuih.
Game 3 leh 4 te Boston court-ah khelh a ni dawn a, Warriors tan mikhual team ni chunga chak a pawimawh dawn.